ബെംഗളൂരുവിൻ്റെ വിനോദസഞ്ചാര മേഖലയ്ക്ക് പുതിയ മുഖം നൽകാൻ 250 മീറ്റർ ഉയരമുള്ള സ്കൈഡെക്ക് പദ്ധതി യാഥാർഥ്യമാക്കാനുള്ള നടപടികൾ ഊർജിതമാക്കി കർണാടക സർക്കാർ. പശ്ചിമ ബെംഗളൂരുവിലെ നാദപ്രഭു കെംപെഗൗഡ ലേഔട്ടിലാണ് പദ്ധതിക്കായി 46.25 ഏക്കർ സ്ഥലം ബെംഗളൂരു വികസന അതോറിറ്റി (BDA) കണ്ടെത്തിയിരിക്കുന്നത്. മൈസൂരു റോഡിനെയും മാഗഡി റോഡിനെയും ബന്ധിപ്പിക്കുന്ന എസ്.എം. കൃഷ്ണ മെയിൻ റോഡിന് സമീപമാണ് നിർദിഷ്ട സ്ഥലം.
ഏകദേശം 600 കോടി രൂപ ചെലവ് പ്രതീക്ഷിക്കുന്ന പദ്ധതിയിൽ നഗരത്തിൻ്റെ വിശാലമായ ആകാശക്കാഴ്ച ആസ്വദിക്കാനുള്ള ഒബ്സർവേഷൻ ഡെക്ക്, ഭക്ഷണശാലകൾ, കഫേകൾ, വിനോദകേന്ദ്രങ്ങൾ, പരിപാടികൾ സംഘടിപ്പിക്കാനുള്ള ഇടങ്ങൾ തുടങ്ങിയ സൗകര്യങ്ങൾ ഒരുക്കാനാണ് ലക്ഷ്യമിടുന്നത്. ഗ്ലാസ് ബോട്ടം വ്യൂവിങ് ഏരിയ, ഉയരത്തിലുള്ള നടപ്പാതകൾ, ഡിജിറ്റൽ അനുഭവകേന്ദ്രങ്ങൾ തുടങ്ങിയവയും പരിഗണനയിലുണ്ട്. അന്തിമ രൂപരേഖയിൽ ഇവ ഉൾപ്പെടുത്തുന്നത് സംബന്ധിച്ച് തീരുമാനമായിട്ടില്ല.
ഭീമനകുപ്പെ, ചല്ലഘട്ട ഗ്രാമങ്ങളിലെ വിവിധ സർവേ നമ്പറുകളിലായി വ്യാപിച്ചുകിടക്കുന്ന സ്ഥലമാണ് പദ്ധതിക്കായി തിരഞ്ഞെടുത്തത്. നേരത്തെ ഹെമ്മിഗെപുര, ബാംഗ്ലൂർ സർവകലാശാല പരിസരം, ബയ്യപ്പനഹള്ളി തുടങ്ങിയ സ്ഥലങ്ങളും പരിഗണിച്ചിരുന്നെങ്കിലും വിമാനത്താവളവുമായി ബന്ധപ്പെട്ട ഉയരനിയന്ത്രണങ്ങൾ ഉൾപ്പെടെയുള്ള സാങ്കേതിക കാരണങ്ങളാൽ അവ ഒഴിവാക്കുകയായിരുന്നു.
പദ്ധതിയുടെ ഇടപാട് ഉപദേശകനായി ആഗോള കൺസൾട്ടൻസി സ്ഥാപനമായ കെപിഎംജിയെ (KPMG) നിയോഗിച്ചിട്ടുണ്ട്. ഇതിനായി നാല് കോടി രൂപയാണ് ചെലവ് പ്രതീക്ഷിക്കുന്നത്. കെപിഎംജി സംഘം നവംബർ 4ന് നിർദിഷ്ട സ്ഥലം സന്ദർശിച്ചു. ഡിസംബർ അവസാനത്തോടെ പദ്ധതിയുടെ രൂപരേഖ തയ്യാറാക്കി നിർമാണത്തിൽ താൽപര്യമുള്ള കമ്പനികളിൽനിന്ന് താൽപര്യപത്രം ക്ഷണിക്കാനാണ് അധികൃതരുടെ നീക്കം. പൊതു-സ്വകാര്യ പങ്കാളിത്ത (PPP) മാതൃകയിലോ ഇപിസി മാതൃകയിലോ പദ്ധതി നടപ്പാക്കുന്നതും പരിഗണനയിലുണ്ട്.
അതേസമയം, നിർദിഷ്ട സ്ഥലത്തെ അഞ്ചേക്കർ ഭൂമിയുടെ ഉടമസ്ഥാവകാശവുമായി ബന്ധപ്പെട്ട തർക്കം പദ്ധതിക്ക് വെല്ലുവിളിയായേക്കാം. ശ്രീ മാരുതി ഹാൻഡിക്യാപ്ഡ് വെൽഫെയർ അസോസിയേഷന് അനുവദിച്ച ഭൂമിയിലാണ് തർക്കം നിലനിൽക്കുന്നത്. വിഷയത്തിൽ അസോസിയേഷൻ അംഗങ്ങൾ കർണാടക ഹൈക്കോടതിയെ സമീപിച്ചിട്ടുണ്ട്. ഭൂമിക്ക് പകരം മറ്റൊരു സ്ഥലം അനുവദിക്കാനുള്ള ചർച്ചകൾ നടക്കുന്നതായി ബിഡിഎ അധികൃതർ വ്യക്തമാക്കിയിട്ടുണ്ട്.
ബെംഗളൂരുവിനെ പ്രധാന വിനോദസഞ്ചാര കേന്ദ്രമായി ഉയർത്തുന്നതിനും നഗരത്തിന് പുതിയൊരു ആഗോള അടയാളം സൃഷ്ടിക്കുന്നതിനുമുള്ള പദ്ധതിയായാണ് മുഖ്യമന്ത്രി ഡി.കെ. ശിവകുമാർ മുന്നോട്ടുവച്ച സ്കൈഡെക്ക് പദ്ധതി വിലയിരുത്തപ്പെടുന്നത്.
