അണ്ടര് 19 ഏകദിന ലോകകപ്പില് ഇന്ത്യയും ബംഗ്ലാദേശും ഇന്ന് ഏറ്റുമുട്ടും. സമീപകാലത്ത് ഇരുരാജ്യങ്ങളും തമ്മിലുണ്ടായ ഉലച്ചിൽ മത്സരത്തെ ശ്രദ്ധേയമാക്കുന്നുണ്ട്. സിംബാബ്വെയിലെ ബുലവായോ ക്യൂൻസ് സ്പോര്ട്സ് ക്ലബ് ഗ്രൗണ്ടില് ഇന്ത്യൻ സമയം ഉച്ചയ്ക്ക് 1.30നാണ് മത്സരം തുടങ്ങുക.
ന്യൂനപക്ഷങ്ങള്ക്കെതിരെ ബംഗ്ലാദേശില് തുടരുന്ന ആക്രമണങ്ങളില് പ്രതിഷേധിച്ച് ബംഗ്ലാദേശ് പേസര് മുസ്തഫിസുര് റഹ്മാനെ ഐപിഎല് ടീമായ കൊല്ക്കത്ത നൈറ്റ് റൈഡേഴ്സില്നിന്ന് ഒഴിവാക്കിയതോടെയാണ് ഇന്ത്യ-ബംഗ്ലാദേശ് ക്രിക്കറ്റ് ബന്ധം തീര്ത്തും വഷളായത്. ഇതിനെ തുടർന്ന് ബംഗ്ലാദേശ് സര്ക്കാര് രാജ്യത്ത് ഐപിഎല് സംപ്രേഷണം നിര്ത്തിവയ്ക്കുകയും അടുത്തമാസം ഇന്ത്യയില് നടക്കുന്ന ടി20 ലോകകപ്പ് മത്സരവേദി മാറ്റണമെന്ന് ഐസിസിയോട് അഭ്യര്ത്ഥിക്കുകയും ചെയ്തിരുന്നു. ഇത്തരം സംഘര്ഷങ്ങള്ക്കിടെയാണ് ഇന്ത്യയും ബംഗ്ലാദേശും ഇന്ന് പോരിനിറങ്ങുന്നത്. ജിയോ ഹോട്സ്റ്റാറിലും സ്റ്റാര് സ്പോര്ട്സ് നെറ്റ്വര്ക്കിലും മത്സരം തത്സമയം കാണാനാവും.
