നാല് ദിവസത്തെ മധ്യേഷ്യൻ സന്ദർശനത്തിൻ്റെ ഭാഗമായി പ്രധാനമന്ത്രി നരേന്ദ്ര മോദി ഇന്ന് ഉസ്ബെക്കിസ്ഥാൻ പ്രസിഡണ്ട് ഷവ്കത് മിർസിയോയേവുമായി കൂടിക്കാഴ്ച നടത്തും. ഇന്നലെ താഷ്കന്റിലെത്തിയ മോദിക്ക് ഉസ്ബെക്കിസ്ഥാൻ പ്രസിഡണ്ട് വിമാനത്താവളത്തിലെത്തി ഊഷ്മള സ്വീകരണം നൽകി. ഇന്ത്യയും ഉസ്ബെക്കിസ്ഥാനും തമ്മിലുള്ള തന്ത്രപ്രധാനവും സാമ്പത്തികവുമായ സഹകരണം കൂടുതൽ ശക്തിപ്പെടുത്തുന്നതാകും കൂടിക്കാഴ്ചയിലെ പ്രധാന ലക്ഷ്യം.
ഉഭയകക്ഷി ചർച്ചകൾക്ക് ശേഷം ഇരു രാജ്യങ്ങളും വിവിധ മേഖലകളിലെ സഹകരണം സംബന്ധിച്ച കരാറുകളിൽ ഒപ്പുവയ്ക്കും. ഉസ്ബെക്ക് യോഗ ഫെഡറേഷൻ സംഘടിപ്പിക്കുന്ന യോഗാ പരിപാടിയിലും മോദി പങ്കെടുക്കും. തുടർന്ന് താഷ്കന്റിലെ ലാൽ ബഹാദൂർ ശാസ്ത്രി സ്മാരകവും താഷ്കന്റ് സ്റ്റേറ്റ് യൂണിവേഴ്സിറ്റിയുമായി ബന്ധപ്പെട്ട പരിപാടികളും പ്രധാനമന്ത്രി സന്ദർശിക്കും.
തുടർന്ന് മോദി കിർഗിസ്ഥാനിലെ ബിഷ്കെക്കിലേക്ക് തിരിക്കും. ഷാങ്ഹായ് സഹകരണ സംഘടനാ ഉച്ചകോടിയിൽ നാളെ അദ്ദേഹം പങ്കെടുക്കും. ഭീകരവാദം, പശ്ചിമേഷ്യയിലെ സംഘർഷം, മേഖലാ സുരക്ഷ തുടങ്ങിയ വിഷയങ്ങൾ ഉച്ചകോടിയിൽ പ്രധാന ചർച്ചയാകുമെന്നാണ് സൂചന.
ഉച്ചകോടിക്കിടെ റഷ്യൻ പ്രസിഡണ്ട് വ്ളാദിമിർ പുടിൻ, ചൈനീസ് പ്രസിഡണ്ട് ഷി ജിൻപിങ്, പാകിസ്ഥാൻ പ്രധാനമന്ത്രി ഷഹ്ബാസ് ഷരീഫ് തുടങ്ങിയ നേതാക്കളുമായുള്ള കൂടിക്കാഴ്ചകൾക്കും സാധ്യതയുണ്ട്. ഇന്ത്യ–റഷ്യ തന്ത്രപ്രധാന ബന്ധം, പ്രതിരോധം, ഊർജ സഹകരണം തുടങ്ങിയ വിഷയങ്ങളും ചർച്ചയായേക്കും.
കിർഗിസ്ഥാനിൽ നടക്കുന്ന ആറാമത് വേൾഡ് നോമാഡ് ഗെയിംസിൻ്റെ ഉദ്ഘാടനച്ചടങ്ങിലും പ്രധാനമന്ത്രി പങ്കെടുക്കും.
