ഫിഫ ലോകകപ്പിലെ ആദ്യ മത്സരത്തിൽ സെനഗലിനെ 3-1ന് കീഴടക്കി ഫ്രാൻസ് ഗ്രൂപ്പ് ഘട്ടത്തിന് ഉജ്ജ്വല തുടക്കമിട്ടു. സൂപ്പർതാരം കിലിയൻ എംബാപ്പെയുടെ ഇരട്ടഗോളുകളും ബ്രാഡ്ലി ബാർക്കോളയുടെ മനോഹര ഗോളുമാണ് ഫ്രാൻസിൻ്റെ വിജയത്തിന് വഴിയൊരുക്കിയത്. സെനഗലിനായി ഇബ്രാഹിം എംബാ ആശ്വാസഗോൾ നേടി.
ആദ്യ പകുതിയിൽ പ്രതീക്ഷിച്ച മികവ് പുറത്തെടുക്കാൻ ഫ്രാൻസിന് കഴിഞ്ഞില്ലെങ്കിലും രണ്ടാം പകുതിയിൽ ആക്രമണ ഫുട്ബോളുമായി അവർ കളം നിറഞ്ഞു. സെനഗൽ അവസാന നിമിഷങ്ങളിൽ തിരിച്ചുവരാൻ ശ്രമിച്ചെങ്കിലും എംബാപ്പെയുടെ രണ്ടാമത്തെ ഗോൾ ഫ്രാൻസിൻ്റെ ജയം ഉറപ്പിച്ചു.
മത്സരത്തിലെ ഇരട്ടഗോളോടെ ലോകകപ്പ് ചരിത്രത്തിലും എംബാപ്പെ പുതിയ നേട്ടം സ്വന്തമാക്കി. മത്സരത്തിന് മുമ്പ് 12 ലോകകപ്പ് ഗോളുകളുമായി ബ്രസീൽ ഇതിഹാസം പെലെയ്ക്കൊപ്പമായിരുന്ന താരം, ആദ്യ ഗോളിലൂടെ പെലെയെ മറികടന്ന് ലയണൽ മെസ്സിയുടെ 13 ഗോളുകളുടെ റെക്കോർഡിനൊപ്പമെത്തി. തുടർന്ന് ഇഞ്ചുറി ടൈമിൽ നേടിയ രണ്ടാം ഗോളോടെ ലോകകപ്പിലെ തന്റെ ആകെ ഗോൾ നേട്ടം 14 ആക്കി ഉയർത്തി മെസ്സിയെയും പിന്നിലാക്കി.
വിജയത്തോടെ ഗ്രൂപ്പ് ഘട്ടത്തിലെ നിർണായക മൂന്ന് പോയിന്റുകൾ സ്വന്തമാക്കിയ ഫ്രാൻസ് കിരീടപ്പോരാട്ടത്തിലേക്കുള്ള ശക്തമായ സന്ദേശവും നൽകി.
