സിംബാബ്‌വെയ്ക്കെതിരായ മൂന്നാം ട്വന്റി20 മത്സരത്തിൽ ഇന്ത്യ 35 റൺസിൻ്റെ മികച്ച വിജയം സ്വന്തമാക്കി. ആദ്യ രണ്ട് മത്സരങ്ങളും ജയിച്ച് പരമ്പര നേരത്തെ ഉറപ്പിച്ചിരുന്ന ഇന്ത്യ, മൂന്നാം മത്സരവും വിജയിച്ച് ആധിപത്യം തുടർന്നു.
ആദ്യം ബാറ്റ് ചെയ്ത ഇന്ത്യ അഞ്ച് വിക്കറ്റ് നഷ്ടത്തിൽ 192 റൺസ് നേടി. 49 പന്തിൽ എട്ട് ഫോറും നാല് സിക്‌സും ഉൾപ്പെടെ 81 റൺസ് നേടിയ വൈഭവ് സൂര്യവംശിയാണ് ഇന്ത്യൻ ഇന്നിങ്‌സിൻ്റെ നട്ടെല്ലായത്. ഇഷാൻ കിഷൻ 29 റൺസും ശ്രേയസ് അയ്യർ 27 റൺസും റിങ്കു സിങ് 25 റൺസും നേടി. തിലക് വർമ 11 റൺസുമായി പുറത്താകാതെ നിന്നു. എന്നാൽ അഭിഷേക് ശർമ്മയ്ക്ക് വീണ്ടും നിരാശയായിരുന്നു; നാല് പന്തിൽ രണ്ട് റൺസ് മാത്രമാണ് നേടാനായത്.
193 റൺസ് വിജയലക്ഷ്യവുമായി ഇറങ്ങിയ സിംബാബ്‌വെയ്ക്ക് നിശ്ചിത 20 ഓവറിൽ ഏഴ് വിക്കറ്റ് നഷ്ടത്തിൽ 157 റൺസ് മാത്രമേ നേടാനായുള്ളൂ. 54 റൺസുമായി പുറത്താകാതെ നിന്ന റയാൻ ബർളാണ് ടീമിൻ്റെ ടോപ് സ്കോറർ.
ഇന്ത്യൻ ബൗളിങ് നിരയിൽ മായങ്ക് യാദവ് മൂന്ന് വിക്കറ്റ് വീഴ്ത്തി തിളങ്ങിയപ്പോൾ, യാഷ് താക്കൂർ രണ്ട് വിക്കറ്റുകൾ നേടി നിർണായക സംഭാവന നൽകി. സിംബാബ്‌വെയ്ക്കായി ബ്രാഡ് ഇവാൻസ് രണ്ട് വിക്കറ്റ് വീഴ്ത്തിയപ്പോൾ, സിക്കന്ദർ റാസ, ബ്ലെസ്സിങ് മുസറബാനി, വെസ്ലി മധേവരെ എന്നിവർ ഓരോ വിക്കറ്റ് വീതം നേടി.
