കോട്ടയം നാട്ടകത്ത് സീരിയൽ നടൻ സിദ്ധാർഥ് പ്രഭുവിന്റെ വാഹനം ഇടിച്ച് ചികിത്സയിലായിരുന്ന വയോധികൻ മരിച്ചു. തമിഴ്നാട് സ്വദേശി തങ്കരാജ് ആണ് മരിച്ചത്. നാട്ടകത്ത് ഡിസംബർ 24ന് രാത്രി എംസി റോഡിൽ ആയിരുന്നു അപകടം നടന്നത്. അപകടത്തിൽ തങ്കരാജിന്റെ തലയ്ക്ക് ഗുരുതരമായി പരിക്കേറ്റിരുന്നു. കഴിഞ്ഞ ഒരാഴ്ചയായി തങ്കരാജ് കോട്ടയം മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. മദ്യപിച്ച് അമിതവേഗത്തിൽ വണ്ടിയോടിച്ച സിദ്ധാർഥ് പ്രഭു തങ്കരാജിനെ ഇടിച്ചിടുകയായിരുന്നു. വാഹനം തടഞ്ഞുനിർത്തിയ നാട്ടുകാർ സിദ്ധാർഥുമായി വാക്കുതർക്കത്തിലേർപ്പെടുകയും അത് കൈയാങ്കളിയിലെത്തുകയും ചെയ്തിരുന്നു. പോലീസുമായും സീരിയൽ താരം തർക്കത്തിലേർപ്പെട്ടിരുന്നു.
ചിങ്ങവനം പോലീസ് ആണ് പ്രതിയെ കസ്റ്റഡിയിലെടുത്ത് വൈദ്യപരിശോധനയ്ക്ക് വിധേയനാക്കിയത്. സിദ്ധാർഥ് മദ്യപിച്ചിരുന്നതായാണ് വൈദ്യപരിശോധന ഫലം. ജാമ്യത്തിൽ വിട്ടയച്ച പ്രതിയെ കൂടുതൽ വകുപ്പുകൾ ചുമത്തി അറസ്റ്റ് ചെയ്യും.
