ഏറ്റുമാനൂർ സ്വദേശി ജൈനമ്മയുടെ തിരോധാനകേസിൽ അറസ്റ്റിലായ സെബാസ്റ്റ്യനുമായുള്ള തെളിവെടുപ്പും ചോദ്യം ചെയ്യലും ഇന്നും തുടരും. സെബാസ്റ്റ്യൻ ഒരു കൂസലും ഇല്ലാതെയാണ് അന്വേഷണ സംഘത്തിന്‍റെ ചോദ്യങ്ങൾക്ക് മറുപടി നൽകാതെ ഇരിക്കുന്നത്. മൗനവും ചിരിയും മാത്രമാണ് ഉത്തരം.
ഇന്നലെ ചേർത്തല പള്ളിപ്പുറത്തെ വീട്ടിൽ സെബാസ്റ്റ്യനെ എത്തിച്ച് നടത്തിയ തെളിവെടുപ്പിൽ കൂടുതൽ അസ്ഥിക്കഷ്ണങ്ങളും സ്ത്രീകളുടെ വസ്ത്രത്തിന്‍റെ ഭാഗങ്ങളും സ്ത്രീകൾ ഉപയോഗിക്കുന്ന ബാഗും ലഭിച്ചിരുന്നു.
ഇവയും പുരയിടത്തിന്‍റെ വിവിധ ഭാഗങ്ങളിൽ നിന്ന് ശേഖരിച്ച വെള്ളവും മണ്ണും ശാസ്ത്രീയ പരിശോധനയ്ക്ക് അയക്കും. ഡിഎന്‍എ പരിശോധനയ്ക്ക് കണ്ടെത്തിയ അസ്ഥിക്കഷ്ണങ്ങൾ അയക്കുമെന്ന് അന്വേഷണം സംഘം അറിയിച്ചു. കൂടുതൽ തെളിവുകൾ സെബാസ്റ്റ്യന്‍റെ കസ്റ്റഡി അവസാനിക്കും മുമ്പ് കണ്ടെത്താനുള്ള ശ്രമത്തിലാണ് കോട്ടയത്തെ ക്രൈംബ്രാഞ്ച് അന്വേഷണ സംഘം.
ചേർത്തലയിൽ നിന്ന് കാണാതായ സിന്ധു, ഐഷ, ബിന്ദു പത്മനാഭൻ എന്നിവരുടെ തിരോധാനക്കേസിന്‍റെ തുടരന്വേഷണവും പുരോഗമിക്കുകയാണ്. ആലപ്പുഴയിൽ നിന്നുള്ള അന്വേഷണസംഘവും സെബാസ്റ്റ്യന്‍റെ വീടും പുരയിടവും പരിശോധന നടത്തും.
