ഏഷ്യൻ ഗെയിംസിലെ 10 മീറ്റർ എയർ പിസ്റ്റൾ മിക്‌സഡ് ടീം ഇനത്തിൽ ഇന്ത്യ ഫൈനലിൽ പ്രവേശിച്ചു. യോഗ്യതാ റൗണ്ടിൽ കമൽജീത്തും സുരുചി ഇന്ദർ സിങ്ങും 587 പോയിന്റുമായി ഒന്നാം സ്ഥാനത്തെത്തിയാണ് ഫൈനലിന് യോഗ്യത നേടിയത്. 50 മീറ്റർ റൈഫിൾ 3 പൊസിഷൻ ഇനത്തിലും ഇന്ത്യ ഇന്ന് മത്സരിക്കും.
ഷൂട്ടിങ്ങിൽ തുടർച്ചയായ തിരിച്ചടികൾക്ക് ശേഷം സ്വർണ മെഡലിലൂടെ തിരിച്ചുവരികയാണ് ഇന്ത്യയുടെ ലക്ഷ്യം. സ്‌കീറ്റിൽ തുടർച്ചയായ രണ്ടാം ദിവസവും വെങ്കലം നേടിയതാണ് ഇതുവരെയുള്ള പ്രധാന നേട്ടം. മിക്‌സഡ് ഇനത്തിൽ പരിനാസ് ധലിവാലും ആനന്ദ്ജീത് സിങ്ങുമാണ് വെങ്കലം നേടിയത്. ഇരുവരും കഴിഞ്ഞ ദിവസം ഡബിൾസ് ഇനത്തിലും വെങ്കലം നേടിയിരുന്നു.
ഷൂട്ടിങ്ങിൽ ഇതുവരെ നാല് വെള്ളിയും നാല് വെങ്കലവുമാണ് ഇന്ത്യ നേടിയത്. ഒൻപത് സ്വർണവുമായി ചൈനയാണ് ഈ വിഭാഗത്തിൽ മുന്നിൽ. ഹാങ്ഷു ഏഷ്യൻ ഗെയിംസിൽ ഷൂട്ടിങ്ങിൽ ഇന്ത്യ ഏഴ് സ്വർണം നേടിയിരുന്നു.
ഇത്തവണ പുരുഷന്മാരുടെ 10 മീറ്റർ എയർ പിസ്റ്റൾ വ്യക്തിഗത ഇനത്തിൽ ഇന്ത്യൻ താരങ്ങൾക്ക് ഫൈനലിലെത്താനായില്ല. കമൽജീത് ഒൻപതാം സ്ഥാനത്തും ആകാശ് ഭരദ്വാജ് 11-ാം സ്ഥാനത്തും കേദാർലിങ് ഉചഗാൻവെ 35-ാം സ്ഥാനത്തുമാണ് ഫിനിഷ് ചെയ്തത്. ടീം ഇനത്തിൽ ഇന്ത്യ നാലാം സ്ഥാനത്തായി.
വനിതകളുടെ വിഭാഗത്തിലും മനു ഭാക്കർ, ഇഷാ സിങ്, സുരുചി സിങ് എന്നിവർക്ക് പ്രതീക്ഷിച്ച പ്രകടനം പുറത്തെടുക്കാനായില്ല. കഴിഞ്ഞ ഏഷ്യൻ ഗെയിംസിലെ 22 മെഡൽ നേട്ടം ആവർത്തിക്കാനുള്ള ഇന്ത്യയുടെ സാധ്യതകളും ഇതോടെ വെല്ലുവിളിയിലായി.
അതേസമയം, ബാഡ്മിന്റൺ മിക്‌സഡ് ഡബിൾസിൽ ധ്രുവ് കപില–ടാനിഷ ക്രസ്റ്റോ സഖ്യം പ്രീ ക്വാർട്ടറിൽ പ്രവേശിച്ചു. മാലദ്വീപ് സഖ്യത്തെ 21-8, 21-7 എന്ന സ്‌കോറിനാണ് ഇന്ത്യൻ സഖ്യം പരാജയപ്പെടുത്തിയത്.
