ഹൈദരാബാദിനായി വിജയ് ഹസാരെ ട്രോഫിയിൽ കളിക്കുന്ന തിലക് വർമ്മയ്ക്ക് അടിവയറ്റിൽ പരിക്കേറ്റു. യുവ ഇന്ത്യൻ ക്രിക്കറ്റ് താരത്തിന് പരിക്കേറ്റത് വരാനിരിക്കുന്ന ടി20 ലോകകപ്പിന് മുൻപ് ടീം ഇന്ത്യയ്ക്ക് വലിയ ആശങ്കയുണ്ടാക്കുന്നു. കടുത്ത വേദനയെത്തുടർന്ന് തിലക് വർമ്മയെ അടിയന്തരമായി ആശുപത്രിയിൽ പ്രവേശിപ്പിക്കുകയും വിജയകരമായി ശസ്ത്രക്രിയ പൂർത്തിയാക്കുകയും ചെയ്‌തു.
നിലവിൽ അദ്ദേഹം വിശ്രമത്തിലാണ്. ശസ്ത്രക്രിയക്ക് ശേഷമുള്ള അദ്ദേഹത്തിൻ്റെ രോഗമുക്തിയുടെ പുരോഗതി മെഡിക്കൽ പാനൽ സൂക്ഷ്മമായി നിരീക്ഷിച്ചുവരികയാണ്. കളിക്കളത്തിലേക്ക് തിരിച്ചുവരാൻ എത്ര സമയമെടുക്കുമെന്ന് വിലയിരുത്തിയ ശേഷം കൂടുതൽ വിവരങ്ങൾ അറിയിക്കുമെന്നാണ് സൂചന. ജനുവരി 21ന് ന്യൂസിലൻഡിനെതിരായ ടി20 പരമ്പര ആരംഭിക്കുന്നത്. പി.ടി.ഐ റിപ്പോർട്ടുകൾ പ്രകാരം, പരിക്കിൻ്റെ ഗൗരവം കണക്കിലെടുത്ത് തിലക് വർമ്മയ്ക്ക് ഈ സുപ്രധാന പരമ്പര പൂർണ്ണമായും നഷ്ടപ്പെടാനാണ് സാധ്യത. ടി20 ലോകകപ്പിന് മുന്നോടിയായുള്ള ഈ പരമ്പരയിൽ തിലകിനെപ്പോലെ ഒരു പ്രധാന താരത്തിൻ്റെ അഭാവം ഇന്ത്യക്ക് തിരിച്ചടിയാകും.
