നിയമസഭാ തെരഞ്ഞെടുപ്പിൽ തനിക്ക് സീറ്റ് നൽകാമെന്ന് കോണ്ഗ്രസ് ഉറപ്പ് നൽകിയിരുന്നതായും പാർട്ടി തന്നോട് നീതി കാട്ടുമെന്നാണ് പ്രതീക്ഷയെന്നും ദീപ്തി മേരി വർഗീസ്. “കൊച്ചി മേയർ സ്ഥാനം നിഷേധിക്കപ്പെട്ടപ്പോൾ നിയമസഭാ തെരഞ്ഞെടുപ്പിൽ പരിഗണിക്കപ്പെടുമെന്ന് കെപിസിസി പ്രസിഡന്റ് തന്നെ ഉറപ്പ് നൽകിയിരുന്നു. സ്ത്രീകൾക്ക് പ്രാധാന്യം നൽകുന്ന പട്ടികയാവും കോണ്ഗ്രസ് എന്ന് പ്രതിപക്ഷ നേതാവ് പറഞ്ഞിരുന്നു. ഏതെങ്കിലും സീറ്റ് താൻ ആവശ്യപ്പെട്ടിട്ടില്ല.’-ദീപ്തി പറഞ്ഞു.
‘തൃക്കാക്കരയാണ് എന്റെ മണ്ഡലം. പി.ടി തോമസിന്റെ ഭാര്യ ഉമാ തോമസാണ് അവിടെ നിലവിൽ എംഎൽഎ. അവർ തന്നെ മൽസരിക്കണമോയെന്ന് പാർട്ടി തീരുമാനിക്കട്ടെ. കോര്പ്പറേഷൻ തെരഞ്ഞെടുപ്പിൽ ഉണ്ടായ വീഴ്ചയ്ക്ക് നേതൃത്വം തിരുത്തൽ വരുത്തുമെന്ന് പ്രതീക്ഷിക്കുന്നുവെന്നും’ ദീപ്തി മേരി വര്ഗീസ് പറഞ്ഞു.
ദീപ്തി മേരി വര്ഗീസിനെ കൊച്ചി കോര്പ്പറേഷൻ മേയര് സ്ഥാനത്തേക്ക് പരിഗണിച്ചിരുന്നെങ്കിലും അവസാന നിമിഷം ഒഴിവാക്കിയിരുന്നു. അത് അതൃപ്തിക്കിടയാക്കിയിരുന്നു. പ്രശ്ന പരിഹാരമെന്ന നിലയിൽ ദീപ്തിക്ക് നിയമസഭാ സീറ്റ് വാഗ്ദാനം ചെയ്തിരുന്നുവെന്നും അന്ന് വാർത്തകളുണ്ടായിരുന്നു.
