ഇ പി ജയരാജന് എതിരെയുള്ള റിസോർട്ട് വിവാദം വീണ്ടും ഉയർത്തി പി. ജയരാജൻ. വൈദേകം റിസോർട്ടുമായി ബന്ധപ്പെട്ട് താൻ എഴുതി നൽകിയ പരാതിയിൽ എന്തു നടപടിയെടുത്തെന്ന് കഴി‍ഞ്ഞ സംസ്ഥാന സമിതി യോഗത്തിൽ പി ജയരാജൻ ചോദിച്ചു. പാർട്ടി ഇക്കാര്യം പരിശോധിക്കുകയാണെന്ന് ആയിരുന്നു സംസ്ഥാന സെക്രട്ടറി എം വി ഗോവിന്ദന്‍റെ മറുപടി.
റിസോർട്ട് വിവാദം പി ജയരാജൻ ആദ്യം ഉന്നയിച്ചത് കോടിയേരി ബാലകൃഷ്ണൻ സംസ്ഥാന സെക്രട്ടറിയായിരിക്കെയാണ്. ഇ പിയെ ഇടതു മുന്നണി കൺവീനർ സ്ഥാനത്തു നിന്ന് മാറ്റിയതിനു പിന്നാലെ ഇക്കാര്യം വീണ്ടും ഉയർത്തി. തെറ്റു തിരുത്തൽ രേഖ ചർച്ച ചെയ്യാൻ ചേർന്ന സംസ്ഥാന സമിതിയിലാണ് ഇ പിക്കെതിരേ പി ജയരാജൻ ആഞ്ഞടിച്ചത്. മുതിർന്ന നേതാവിന് എതിരേയുള്ള ആരോപണം എഴുതി നൽകാൻ സംസ്ഥാന സെക്രട്ടറി ആവശ്യപ്പെട്ടു.
ഗോവിന്ദൻ സംസ്ഥാന സെക്രട്ടറിയായതോടെ പാർട്ടിയുമായി ഇ പി തെറ്റി നിന്ന അവസരം ഉപയോഗിക്കുകയായിരുന്നു പി ജയരാജൻ. എം വി ഗോവിന്ദന്‍റെ നിർദേശ പ്രകാരമായിരുന്നു പി ജയരാജന്‍റെ നീക്കമെന്നും വിലയിരുത്തലുകളുണ്ടായി. സംസ്ഥാന സെക്രട്ടറി ആവശ്യപ്പെട്ടത് അനുസരിച്ച് പി ജയരാജൻ പരാതി എഴുതി നൽകി. ഇപ്പോഴത്തെ ചോദ്യം അതിൽ എന്തു നടപടിയാണ് ഉണ്ടായെന്നാണ്.
