കേരളത്തിലെ രൂക്ഷമായ വൈദ്യുതി പ്രതിസന്ധിയിൽ വലയുന്നത് കോഴി കർഷകരും. മുന്നറിയിപ്പില്ലാതെ തുടർച്ചയായി വൈദ്യുതി മുടങ്ങുന്നതോടെ ഫാമുകളിൽ കൃത്രിമച്ചൂട് ലഭിക്കാതെ കോഴിക്കുഞ്ഞുങ്ങൾ കൂട്ടത്തോടെ ചത്തൊടുങ്ങുകയാണ്. ഇതോടെ കർഷകർക്ക് കനത്ത സാമ്പത്തിക നഷ്ടമാണ് നേരിടേണ്ടിവരുന്നത്.
ഫാമുകളിൽ കോഴിക്കുഞ്ഞുങ്ങളെ വളർത്തുന്ന ബ്രൂഡിങ് കാലയളവിൽ കൃത്രിമച്ചൂട് നിർണായകമാണ്. ഫിലമെന്റ് ബൾബുകളും ഇൻഫ്രാറെഡ് ബൾബുകളുമാണ് സാധാരണയായി ഇതിനായി ഉപയോഗിക്കുന്നത്. കുഞ്ഞുങ്ങൾക്ക് ആവശ്യമായ താപനില നിലനിർത്താനും ഒരേപോലെ ചൂട് ലഭ്യമാക്കാനും ഇവ സഹായിക്കും.
എന്നാൽ മുന്നറിയിപ്പില്ലാത്ത പവർകട്ട് തുടർച്ചയായതോടെ ആവശ്യമായ ചൂട് ഉറപ്പാക്കാൻ കഴിയാത്ത സാഹചര്യമാണെന്ന് കർഷകർ പറയുന്നു. തണുപ്പ് മൂലം പ്രതിരോധശേഷി കുറയുകയും കുഞ്ഞുങ്ങൾ കൂട്ടത്തോടെ ചത്തൊടുങ്ങുകയും ചെയ്യുന്നു.
നേരത്തെ തന്നെ തീറ്റ, മരുന്ന്, വൈദ്യുതി തുടങ്ങിയവയുടെ ചെലവ് വർധിച്ചതോടെ ഉത്പാദനച്ചെലവ് കുതിച്ചുയർന്നിരുന്നു. ഇതിനുപിന്നാലെയാണ് പവർകട്ട് കൂടി കർഷകർക്ക് ഇരുട്ടടിയായത്. വൈദ്യുതി മുടങ്ങുന്നതോടെ കോഴിക്കുഞ്ഞുങ്ങളുടെ നഷ്ടത്തിനൊപ്പം ഫാമുകളുടെ വരുമാനത്തിലും ഇടിവുണ്ടാകുന്നു.
ഉത്പാദനച്ചെലവ് ഉയരുകയും പവർകട്ട് മൂലം അധിക നഷ്ടമുണ്ടാകുകയും ചെയ്തതോടെ സംസ്ഥാനത്തെ കോഴി കർഷകർ കടുത്ത പ്രതിസന്ധിയിലാണെന്ന് മേഖലയിലുള്ളവർ ചൂണ്ടിക്കാട്ടുന്നു.
