ഓണക്കാലത്തെ വൻ സാമ്പത്തിക ബാധ്യതകൾ നിറവേറ്റുന്നതിനായി കേരളം 2,200 കോടി രൂപ കൂടി കടമെടുക്കുന്നു. ഇതിനായുള്ള കടപ്പത്ര ലേലം ചൊവ്വാഴ്ച നടക്കും. ശമ്പളം, പെൻഷൻ, ക്ഷേമപെൻഷൻ, ബോണസ്, ഉത്സവബത്ത തുടങ്ങിയ ഇനങ്ങളിലായി ഓണക്കാലത്ത് സംസ്ഥാനത്തിന് ഏകദേശം 10,000 കോടി രൂപയുടെ ചെലവ് പ്രതീക്ഷിക്കുന്ന സാഹചര്യത്തിലാണ് അധിക വായ്പയെടുക്കുന്നത്.
പുതിയ വായ്പ കൂടി ഉൾപ്പെടുന്നതോടെ യു.ഡി.എഫ്. സർക്കാർ അധികാരത്തിലെത്തിയശേഷം ഇതുവരെ എടുത്ത കടം ഏകദേശം 14,400 കോടി രൂപയായി ഉയരും. സംസ്ഥാനത്തിൻ്റെ കടമെടുപ്പ് പരിധി വർധിപ്പിക്കണമെന്ന് കേന്ദ്രത്തോട് കേരളം ആവശ്യപ്പെട്ടിട്ടുണ്ടെങ്കിലും അനുകൂല തീരുമാനം ലഭിക്കാനുള്ള സാധ്യത കുറവാണെന്നാണ് വിലയിരുത്തൽ.
സാമ്പത്തിക പ്രതിസന്ധി മറികടക്കുന്നതിൻ്റെ ഭാഗമായി വായ്പയ്ക്ക് പുറമേ ട്രഷറിയിൽ പ്രത്യേക നിക്ഷേപ സമാഹരണ പദ്ധതിയും ആരംഭിച്ചിട്ടുണ്ട്. ശനിയാഴ്ച ആരംഭിച്ച പദ്ധതി സെപ്റ്റംബർ 30 വരെ തുടരും. രണ്ടുവർഷമോ അതിൽ കൂടുതലോ കാലാവധിയുള്ള സ്ഥിരനിക്ഷേപങ്ങൾക്ക് നിലവിലുള്ളതിനേക്കാൾ ഉയർന്ന പലിശയാണ് നൽകുന്നത്.
പുതിയ നിക്ഷേപങ്ങൾക്ക് പൊതുജനങ്ങൾക്ക് 7.75 ശതമാനവും മുതിർന്ന പൗരന്മാർക്ക് 8 ശതമാനവും പലിശ ലഭിക്കും. സ്ഥാപനങ്ങളുടെ നിക്ഷേപങ്ങൾക്ക് 7.65 ശതമാനമാണ് പലിശ. നിലവിൽ പൊതുജനങ്ങൾക്കും മുതിർന്ന പൗരന്മാർക്കും 7.5 ശതമാനവും സ്ഥാപനങ്ങൾക്ക് 7.5 ശതമാനവുമാണ് ലഭിക്കുന്നത്. സെപ്റ്റംബർ 30ന് ശേഷം സ്വീകരിക്കുന്ന നിക്ഷേപങ്ങൾക്ക് പഴയ പലിശനിരക്ക് തന്നെ ബാധകമാകും.
അതേസമയം, ട്രഷറി നിക്ഷേപം സംസ്ഥാനത്തിന് ദീർഘകാല സാമ്പത്തിക പരിഹാരമാകില്ലെന്ന ആശങ്കയുമുണ്ട്. ഒരു വർഷം അധികമായി സ്വീകരിക്കുന്ന നിക്ഷേപം സംസ്ഥാനത്തിൻ്റെ കടമായി കണക്കാക്കി അടുത്ത സാമ്പത്തിക വർഷത്തെ വായ്പാ പരിധിയിൽ തുല്യമായ തുക കേന്ദ്രം കുറയ്ക്കുന്ന രീതിയാണ് നിലവിലുള്ളത്. അതിനാൽ അടിയന്തരമായി പണലഭ്യത ഉറപ്പാക്കാൻ സഹായിക്കുമെങ്കിലും ദീർഘകാല സാമ്പത്തിക പ്രതിസന്ധിക്ക് ഇത് പരിഹാരമാകില്ല.
