ബ്രിക്സ് ഉച്ചകോടിയുടെ പശ്ചാത്തലത്തിൽ ഡൽഹിയിലും സമീപ പ്രദേശങ്ങളിലുമുള്ള വിമാന സർവീസുകൾക്ക് കർശന നിയന്ത്രണം ഏർപ്പെടുത്തി. ഇന്ന് മുതൽ സെപ്റ്റംബർ 13 വരെ രാവിലെ 7 മുതൽ രാത്രി 11 വരെ ഷെഡ്യൂൾ ചെയ്യാത്ത വിമാന സർവീസുകൾക്കാണ് നിയന്ത്രണം ബാധകമാകുക.
ഡൽഹിയിൽ നിന്ന് 300 കിലോമീറ്റർ പരിധിയിലുള്ള വിമാനത്താവളങ്ങളിലും നിയന്ത്രണങ്ങൾ നിലവിലുണ്ടാകും. എന്നാൽ നിശ്ചിത സമയക്രമം പാലിച്ച് സർവീസ് നടത്തുന്ന സാധാരണ വിമാനങ്ങൾക്ക് നിയന്ത്രണത്തിൽ ഇളവുണ്ട്.
ഉച്ചകോടിയിൽ പങ്കെടുക്കാനെത്തുന്ന വിദേശ പ്രതിനിധികളുമായി ബന്ധപ്പെട്ട പ്രത്യേക വിമാനങ്ങൾക്ക് കേന്ദ്ര ആഭ്യന്തര മന്ത്രാലയത്തിൻ്റെ മുൻകൂർ അനുമതിയോടെ സർവീസ് നടത്താൻ സാധിക്കും. ഗവർണർമാർ, മുഖ്യമന്ത്രിമാർ തുടങ്ങിയവരുമായി യാത്ര ചെയ്യുന്ന സംസ്ഥാന സർക്കാരുകളുടെ വിമാനങ്ങൾക്കും ഹെലികോപ്റ്ററുകൾക്കും നിയന്ത്രണത്തിൽ നിന്ന് ഇളവ് അനുവദിച്ചിട്ടുണ്ട്.
അടിയന്തര സാഹചര്യങ്ങളിലെ വി.ഐ.പി. സർവീസുകൾ ഒഴികെ സഫ്ദർജംഗ് വിമാനത്താവളം പൂർണമായും അടച്ചിടും. ഉച്ചകോടിയുടെ ഭാഗമായി സുരക്ഷാ ക്രമീകരണങ്ങൾ ശക്തമാക്കിയതിൻ്റെ ഭാഗമായാണ് വ്യോമ ഗതാഗതത്തിലും നിയന്ത്രണം ഏർപ്പെടുത്തിയിരിക്കുന്നത്. ബ്രിക്സ് ഉച്ചകോടിയിൽ പങ്കെടുക്കുന്നതിനായി വിവിധ രാജ്യങ്ങളിൽ നിന്നുള്ള 12ഓളം രാഷ്ട്രത്തലവന്മാരും വിദേശ പ്രതിനിധികളും ശനിയാഴ്ച ഡൽഹിയിലെത്തുമെന്നാണ് വിവരം. ഇവരുടെ വരവും മടങ്ങിപ്പോക്കും കണക്കിലെടുത്താണ് ഡൽഹിയിലും സമീപ വിമാനത്താവളങ്ങളിലും പ്രത്യേക സുരക്ഷാ ക്രമീകരണങ്ങൾ ഏർപ്പെടുത്തിയിരിക്കുന്നത്.
