ഏഷ്യൻ പാരാ ഗെയിംസിൽ മെഡൽ നേട്ടം നൂറ് കടന്ന് ഇന്ത്യയുടെ മുന്നേറ്റം. അഞ്ചാം ദിനത്തിൽ രണ്ട് ലോക റെക്കോർഡുകളോടെ സ്വർണം നേടിയ ഇന്ത്യ മെഡൽപ്പട്ടികയിൽ നാലാം സ്ഥാനത്താണ്. 25 സ്വർണവും 32 വെള്ളിയും 43 വെങ്കലവുമടക്കം ഇന്ത്യ ഇതുവരെ 100 മെഡലുകൾ സ്വന്തമാക്കി.
പുരുഷന്മാരുടെ 400 മീറ്റർ ടി44 വിഭാഗത്തിൽ സന്ദീപ് കുമാറും ജാവലിൻ ത്രോ എഫ്37/38 വിഭാഗത്തിൽ ഹനിയും ലോക റെക്കോർഡോടെ സ്വർണം നേടി. 52.28 സെക്കൻഡിൽ ഫിനിഷ് ചെയ്താണ് സന്ദീപ് കുമാർ 400 മീറ്ററിൽ റെക്കോർഡ് നേട്ടം സ്വന്തമാക്കിയത്. ഇതേ ഇനത്തിൽ ഇന്ത്യയുടെ അജയ് കുമാർ 53.61 സെക്കൻഡിൽ ഫിനിഷ് ചെയ്ത് ഗെയിംസ് റെക്കോർഡോടെ വെങ്കലം നേടി. പാകിസ്താൻ്റെ നൂർ അൽസാൻ വെള്ളി സ്വന്തമാക്കി.
ജാവലിൻ ത്രോയിൽ 60.49 മീറ്റർ ദൂരം കണ്ടെത്തിയാണ് ഹനി സ്വർണം നേടിയത്. അഞ്ചാം ശ്രമത്തിൽ 59.72 മീറ്റർ എറിഞ്ഞ് റെക്കോർഡ് സ്ഥാപിച്ച താരം അവസാന ശ്രമത്തിൽ ദൂരം 60.49 മീറ്ററായി ഉയർത്തി. നേരത്തെ ഡിസ്കസ് ത്രോയിൽ ഹനി വെങ്കലവും നേടിയിരുന്നു.
പുരുഷ സിംഗിൾസ് ബാഡ്മിന്റൺ എസ്‌എൽ3 വിഭാഗത്തിൽ നിതേഷ് കുമാർ സ്വർണവും പ്രമോദ് ഭഗത് വെള്ളിയും നേടി. പാരാ ആർച്ചറി റീക്കർവ് ടീം ഇനത്തിൽ ചൈനയെ 5–1ന് പരാജയപ്പെടുത്തി ഹർവീന്ദർ സിങ്ങും വിജയിയും ഇന്ത്യയ്ക്കായി സ്വർണം സ്വന്തമാക്കി. അഞ്ചാം ദിനത്തിലെ മികച്ച പ്രകടനത്തോടെ മെഡൽപ്പട്ടികയിൽ മുന്നേറ്റം തുടരുകയാണ് ഇന്ത്യ.
