എറണാകുളം മഹാരാജാസ് കോളജ് വിദ്യാർഥി അഭിമന്യു കൊല്ലപ്പെട്ട കേസിൻ്റെ വിചാരണ ഒക്ടോബർ 15ന് എറണാകുളം പ്രിൻസിപ്പൽ സെഷൻസ് കോടതിയിൽ ആരംഭിക്കും. ഹൈക്കോടതി നിർദേശപ്രകാരം നാല് മാസത്തിനകം വിചാരണ പൂർത്തിയാക്കുന്നതിനായാണ് കോടതി സമയക്രമം തയ്യാറാക്കിയത്.
പ്രിൻസിപ്പൽ സെഷൻസ് ജഡ്ജി കെ.കെ. ബാലകൃഷ്ണൻ പരിഗണിക്കുന്ന കേസിൽ പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ ജി. മോഹൻരാജ് ഹാജരാകും. കേസിൽ ആകെ 156 സാക്ഷികളാണുള്ളത്. അവധി ദിവസങ്ങൾ ഒഴിവാക്കി തുടർച്ചയായി നടക്കുന്ന വിചാരണ 18 ദിവസത്തിനുള്ളിൽ പൂർത്തിയാക്കാനാണ് തീരുമാനം.
ഒക്ടോബർ 15ന് ഒന്നും രണ്ടും സാക്ഷികളുടെ വിസ്താരം നടക്കും. തുടർന്ന് മറ്റ് സാക്ഷികളുടെ വിസ്താരം തുടരും. നവംബർ 12നകം സാക്ഷി വിസ്താരം പൂർത്തിയാക്കാനാണ് കോടതിയുടെ ലക്ഷ്യം. പ്രതിഭാഗം ആവശ്യപ്പെട്ട 209 രേഖകളിൽ 112 രേഖകൾ പ്രോസിക്യൂഷൻ കോടതിയിൽ സമർപ്പിച്ചിട്ടുണ്ട്.
2018 ജൂലൈ 2നാണ് ചുവരെഴുത്തുമായി ബന്ധപ്പെട്ട തർക്കത്തെ തുടർന്ന് മഹാരാജാസ് കോളജിൽ എസ്.എഫ്.ഐ പ്രവർത്തകനായ അഭിമന്യു കൊല്ലപ്പെട്ടത്. ക്യാമ്പസ് ഫ്രണ്ട് പ്രവർത്തകരാണ് കൊലപാതകത്തിന് പിന്നിലെന്നാണ് കേസ്. ആദ്യഘട്ടത്തിൽ 16 പ്രതികളാണ് വിചാരണ നേരിടുന്നത്.
കൊലപാതകം, മാരകായുധം ഉപയോഗിച്ച് പരിക്കേൽപ്പിക്കൽ, ക്രിമിനൽ ഗൂഢാലോചന, തെളിവ് നശിപ്പിക്കൽ, കലാപശ്രമം, നിയമവിരുദ്ധമായി സംഘം ചേരൽ തുടങ്ങിയ ഗുരുതര കുറ്റങ്ങളാണ് പ്രതികൾക്കെതിരെ ചുമത്തിയിരിക്കുന്നത്.
കുറ്റപത്രം സമർപ്പിച്ച് വർഷങ്ങൾ കഴിഞ്ഞിട്ടും വിചാരണ ആരംഭിക്കാത്തതിനെതിരെ അഭിമന്യുവിൻ്റെ അമ്മ ഹൈക്കോടതിയെ സമീപിച്ചിരുന്നു. കോടതിയുടെ കസ്റ്റഡിയിലുണ്ടായിരുന്ന ചില രേഖകൾ നഷ്ടപ്പെട്ടതും അന്വേഷണത്തിലുണ്ടായ കാലതാമസവും കേസിൽ വിവാദമായിരുന്നു. ഇതിന് പിന്നാലെയാണ് വിചാരണ വേഗത്തിൽ പൂർത്തിയാക്കാൻ ഹൈക്കോടതി നിർദേശം നൽകിയത്.
