പ്രധാനമന്ത്രി നരേന്ദ്രമോദിയുടെ ആസാമിലെ പരിപാടിക്കു പിന്നാലെ അടുത്ത 15നോ 16നോ നിയമസഭാ തെരഞ്ഞെടുപ്പ് പ്രഖ്യാപിക്കുമെന്നാണ് കേന്ദ്ര തെരഞ്ഞെടുപ്പു കമ്മീഷൻ അധികൃതർ നൽകുന്ന വിവരം. സംസ്ഥാനത്ത് കഴിഞ്ഞ ദിവസമെത്തിയ മുഖ്യ തെരഞ്ഞെടുപ്പു കമ്മീഷണറും കമ്മീഷണർമാരും രാഷ്‌ട്രീയ പാർട്ടി പ്രതിനിധികളുമായി കൊച്ചിയിൽ നടത്തിയ ചർച്ചയിൽ ഒരാഴ്ചയ്ക്കുള്ളിൽ തെരഞ്ഞെടുപ്പു പ്രഖ്യാപനമുണ്ടാകുമെന്ന് രാഷ്‌ട്രീയ പാർട്ടികൾക്ക് ഉറപ്പു നൽകിയിരുന്നു.
എത്രയും വേഗം നിയമസഭാ തെരഞ്ഞെടുപ്പ് പ്രഖ്യാപിക്കണമെന്നായിരുന്നു കേരളത്തിലെ പ്രതിപക്ഷ കക്ഷികൾ കേന്ദ്ര തെരഞ്ഞെടുപ്പു കമ്മീഷനോട് ആവശ്യപ്പെട്ടത്.ആഴ്ചയിൽ രണ്ടും മൂന്നും ദിവസം സംസ്ഥാന മന്ത്രിസഭായോഗം ചേർന്ന് പ്രഖ്യാപനങ്ങൾ നട ത്തുന്ന കാര്യവും ചൂണ്ടിക്കാട്ടിയിരുന്നു. ഇതിനു ശേഷം സർക്കാരുകൾക്ക് ആനുകൂല്യം പ്രഖ്യാപിക്കാൻ കഴിയില്ല. തെരഞ്ഞെടുപ്പ് പ്രഖ്യാപിച്ച് കുറച്ചു ദിവസങ്ങൾ കഴിഞ്ഞാകും വിജ്ഞാപനം ഇറങ്ങുക.
കേരളത്തിൽ വിഷുവിനും ഈസ്റ്ററിനും ശേഷം വരുന്ന ഏപ്രിൽ മാസത്തെ ആഴ്ച തെരഞ്ഞെടുപ്പു നടത്തണമെന്ന ആവശ്യമാണ് മിക്ക രാഷ്‌ട്രീയ പാർട്ടികളും ഉന്നയിച്ചത്. തെരഞ്ഞെടുപ്പ് ഏപ്രിൽ 18നും 22നും ഇടയിൽ നടത്തുന്നതാകും ഉചിതമെന്ന നിർദേശം കേരളത്തിലെ ബന്ധപ്പെട്ട തെരഞ്ഞെടുപ്പ് ഉദ്യോഗസ്ഥരും നൽകിയിട്ടുണ്ടെന്നാണ് വിവരം. ഏപ്രിൽ 28ന് തൃശൂർ പൂരം കൂടി വരുന്ന സാഹചര്യത്തിലാണ് ഇത്.
