കർണാടകയിൽ മഴക്കുറവ് രൂക്ഷമായ സാഹചര്യത്തിൽ കൃത്രിമ മഴയ്ക്കായി ക്ലൗഡ് സീഡിങ് പദ്ധതി നടപ്പാക്കാൻ സംസ്ഥാന സർക്കാർ ഒരുങ്ങുന്നു. ഏകദേശം ₹27 കോടി ചെലവിൽ 60 ദിവസത്തേക്കാണ് പദ്ധതി. അടുത്ത ദിവസങ്ങളിൽ തന്നെ പ്രവർത്തനം ആരംഭിക്കാനാണ് തീരുമാനം.
ജൂൺ ഒന്നുമുതൽ ഓഗസ്റ്റ് 24 വരെ സംസ്ഥാനത്തിന് ലഭിക്കേണ്ടിയിരുന്ന 654 മില്ലിമീറ്റർ മഴയ്ക്ക് പകരം 454 മില്ലിമീറ്റർ മാത്രമാണ് ലഭിച്ചത്. ഇതോടെ 31 ശതമാനം മഴക്കുറവാണ് രേഖപ്പെടുത്തിയിരിക്കുന്നത്. സംസ്ഥാനത്തെ 240 താലൂക്കുകളിൽ 175 എണ്ണത്തിലും മഴക്കുറവുണ്ടെന്നാണ് റിപ്പോർട്ട്.
ജലക്ഷാമവും കാർഷിക മേഖലയിലെ പ്രതിസന്ധിയും രൂക്ഷമാകുന്നത് ഒഴിവാക്കുകയാണ് ക്ലൗഡ് സീഡിങ്ങിലൂടെ സർക്കാർ ലക്ഷ്യമിടുന്നത്. നാല് റവന്യൂ ഡിവിഷനുകളിലായി അനുയോജ്യമായ മേഘങ്ങൾ ലഭിക്കുന്ന പ്രദേശങ്ങളിലാണ് വിമാനങ്ങൾ ഉപയോഗിച്ച് ക്ലൗഡ് സീഡിങ് നടത്തുക. മേഘങ്ങൾ ലഭ്യമല്ലെങ്കിൽ ഈ പ്രക്രിയ നടത്താനാകില്ലെന്നും അധികൃതർ വ്യക്തമാക്കിയിട്ടുണ്ട്.
പദ്ധതിയുടെ ഭാഗമായി ഏകദേശം 200 മണിക്കൂർ വിമാന സർവീസ് നടത്താനാണ് തീരുമാനം. ദിവസവും രാവിലെ 8 മുതൽ വൈകിട്ട് 6 വരെയാണ് പ്രവർത്തനങ്ങൾ നടത്തുക. സെപ്റ്റംബറിൽ കനത്ത മേഘങ്ങൾ കൂടുതലായി ലഭിക്കുമെന്നാണ് സർക്കാർ പ്രതീക്ഷിക്കുന്നത്.
ക്ലൗഡ് സീഡിങ് നടത്തുന്ന പ്രദേശത്തിന് ഏകദേശം 15 കിലോമീറ്റർ ചുറ്റളവിൽ മഴ ലഭിക്കുമെന്നാണ് കണക്കുകൂട്ടൽ. എന്നാൽ അനുയോജ്യമായ മേഘങ്ങളുടെ സാന്നിധ്യം നിർണായകമാണ്. നേരത്തെയും കർണാടകയിൽ മൂന്ന് തവണ ക്ലൗഡ് സീഡിങ് നടത്തിയിട്ടുണ്ടെന്നും അന്ന് 18–20 ശതമാനം വരെ വിജയശതമാനം മാത്രമാണ് ലഭിച്ചതെന്നും ജലവിഭവമന്ത്രി എൻ. ചെലുവാര്യസ്വാമി പറഞ്ഞു. ഇത്തവണ 30 ശതമാനം വിജയമാണ് സർക്കാർ ലക്ഷ്യമിടുന്നത്.
ക്ലൗഡ് സീഡിങ് പദ്ധതിയുടെ മേൽനോട്ടത്തിനായി മൂന്ന് കമ്മിറ്റികളും രൂപീകരിക്കും. ഐഐടി, ഐഐഎസ്‌സി, കാലാവസ്ഥാ വകുപ്പ് എന്നിവയിലെ വിദഗ്ധർ ഉൾപ്പെടുന്ന സാങ്കേതിക സമിതിയും ഇതിലുണ്ടാകും.
