ചരിത്രം കുറിച്ച് സാത്വിക്-ചിരാഗ് സഖ്യം, ഇന്ത്യക്ക് കന്നി പുരുഷ ഡബിൾസ് കിരീടം. സിംഗപ്പൂർ ഓപ്പൺ സൂപ്പർ 750 ടൂർണമെന്റിൽ പുരുഷ ഡബിൾസ് കിരീടം ചൂടുന്ന ആദ്യ ഇന്ത്യൻ സഖ്യമെന്ന സുവർണ്ണ നേട്ടമാണ് ഇരുവരും സ്വന്തമാക്കിയത്. ആവേശം അണപൊട്ടിയ ഫൈനൽ പോരാട്ടത്തിൽ ഇന്തോനേഷ്യയുടെ കരുത്തരായ ഫജർ അൽഫിയാൻ – മുഹമ്മദ് ഫിക്രി സഖ്യത്തെയാണ് ഇന്ത്യ മലർത്തിയടിച്ചത്. ഒരു മണിക്കൂറും 13 മിനിറ്റും നീണ്ടുനിന്ന കടുത്ത പോരാട്ടത്തിനൊടുവിലായിരുന്നു ഇന്ത്യൻ സഖ്യത്തിൻ്റെ കിരീടധാരണം.
ആദ്യ സെറ്റ് 18-21 ന് നഷ്ടമായ ശേഷമാണ് ലോക നാലാം നമ്പറായ സാത്വികും ചിരാഗും കോർട്ടിലേക്ക് ശക്തമായി തിരിച്ചെത്തിയത്. കൃത്യമായ തന്ത്രങ്ങളോടെ കളം നിറഞ്ഞ ഇന്ത്യൻ ജോഡി അടുത്ത രണ്ട് സെറ്റുകളും (21-17, 21-16) സ്വന്തമാക്കി കളി തങ്ങളുടെ കൈപ്പിടിയിലൊതുക്കുകയായിരുന്നു. ഏഷ്യൻ ഗെയിംസിലെയും കോമൺവെൽത്ത് ഗെയിംസിലെയും ചാമ്പ്യന്മാരായ ഈ സഖ്യത്തിൻ്റെ കരിയറിലെ ഒൻപതാം വേൾഡ് ടൂർ കിരീടമാണിത്.
കൂടാതെ ഇവരുടെ മൂന്നാമത്തെ സൂപ്പർ 750 കിരീടവുമാണിത്. 2024-ലെ തായ്‌ലൻഡ് ഓപ്പണിലാണ് ഇരുവരും ഇതിനുമുമ്പ് അവസാനമായി ഒരു കിരീടം ഉയർത്തിയത്. അതിനുശേഷം കളിച്ച നാല് പ്രധാന ടൂർണമെന്റുകളുടെ ഫൈനലിലും റണ്ണേഴ്സ് അപ്പാകാനായിരുന്നു ഇവർക്ക് വിധി. തുടർച്ചയായ നിരാശകൾക്കൊടുവിലാണ് സിംഗപ്പൂരിലെ ഈ സുവർണ്ണ നേട്ടം.
