ഹെസർഘട്ട റോഡിലെ തിരുമലപ്പുര ഗവ. ഹയർ പ്രൈമറി സ്കൂളിൻ്റെ (GHPS) ഓഫിസ് പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനായി ‘സാന്ത്വനം ബാംഗ്ലൂർ’ പ്രവർത്തകർ കമ്പ്യൂട്ടർ നൽകി. സ്കൂളിന് ആവശ്യമായ അടിസ്ഥാന സൗകര്യങ്ങൾ ഒരുക്കുന്നതിലൂടെ വിദ്യാർഥികൾക്കും അധ്യാപകർക്കും കൂടുതൽ സൗകര്യമൊരുക്കുക എന്ന ലക്ഷ്യത്തോടെയാണ് സഹായം നൽകിയത്.
‘സാന്ത്വനം ബാംഗ്ലൂർ’ പ്രവർത്തകരായ ഉമേഷ്, സുരേഷ് പാൽകുളങ്ങര എന്നിവർ നേതൃത്വം നൽകി. സ്കൂളിൻ്റെ ആവശ്യങ്ങൾ മനസ്സിലാക്കി വേണ്ട സഹായം എത്തിക്കുന്നതിൻ്റെ ഭാഗമായാണ് കമ്പ്യൂട്ടർ കൈമാറിയത്.
വിദ്യാഭ്യാസ മേഖലയിലെ ഇത്തരം ഇടപെടലുകൾ സർക്കാർ സ്കൂളുകളുടെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും ഡിജിറ്റൽ സംവിധാനങ്ങളുടെ ഉപയോഗം ശക്തിപ്പെടുത്തുന്നതിനും സഹായകരമാകുമെന്ന് സംഘാടകർ വ്യക്തമാക്കി.
സ്കൂൾ അധികൃതരും അധ്യാപകരും ‘സാന്ത്വനം ബാംഗ്ലൂർ’ പ്രവർത്തകരുടെ സഹകരണത്തിന് നന്ദി അറിയിച്ചു. വിദ്യാഭ്യാസ മേഖലയുമായി ബന്ധപ്പെട്ട് കൂടുതൽ സാമൂഹിക സേവന പ്രവർത്തനങ്ങൾ ഏറ്റെടുക്കാനും സംഘടന ലക്ഷ്യമിടുന്നതായി സാന്ത്വനം ഭാരവാഹികൾ അറിയിച്ചു.
