ശബരിമലയിലെ തിരുവോണ സദ്യ സംബന്ധിച്ച വിവാദത്തിൽ ദേവസ്വം മന്ത്രി കെ. മുരളീധരൻ്റെ നിലപാട് തള്ളി തിരുവിതാംകൂർ ദേവസ്വം ബോർഡ് പ്രസിഡണ്ട് കെ. ജയകുമാർ. തിരുവോണ സദ്യ നടത്തുന്നതിൽ യാതൊരു വീഴ്ചയും സംഭവിച്ചിട്ടില്ലെന്നും, മന്ത്രിക്ക് ലഭിച്ച വിവരം ശരിയായിരിക്കില്ലെന്നും അദ്ദേഹം വ്യക്തമാക്കി.
മന്ത്രിയെ ആരെങ്കിലും തെറ്റിദ്ധരിപ്പിച്ചതാകാമെന്നും ജയകുമാർ പറഞ്ഞു. സന്നിധാനത്തെ മെസിൽ തയ്യാറാക്കിയ സദ്യ 3,000 ഭക്തർ കഴിച്ചെന്നും, സദ്യയ്ക്കായി ആവശ്യമായ എല്ലാ മുന്നൊരുക്കങ്ങളും നടത്തിയിരുന്നെന്നും അദ്ദേഹം വ്യക്തമാക്കി. സംഭവത്തിൽ അനാവശ്യമായ ദുരൂഹത സൃഷ്ടിക്കരുതെന്നും ജയകുമാർ പ്രതികരിച്ചു.
അതേസമയം, സന്നിധാനത്ത് തിരുവോണ സദ്യ മുടങ്ങിയെന്ന പരാതി ലഭിച്ചതായി മന്ത്രി കെ. മുരളീധരൻ കഴിഞ്ഞ ദിവസം വ്യക്തമാക്കിയിരുന്നു. വിഷയത്തിൽ അന്വേഷണം നടത്താൻ തിരുവിതാംകൂർ ദേവസ്വം ബോർഡിന് മന്ത്രി നിർദേശം നൽകിയിരുന്നു. മുൻ സംവിധാനങ്ങളിൽ മാറ്റം വരുത്തിയപ്പോൾ ഏകോപനത്തിൽ വീഴ്ചയുണ്ടായോയെന്നും പരിശോധിക്കണമെന്ന് മന്ത്രി ആവശ്യപ്പെട്ടിരുന്നു.
മൂന്നു ദിവസങ്ങളിലായി നടന്നിരുന്ന സദ്യ ഇത്തവണ ഒരു ദിവസമായി ചുരുക്കിയതും ഭക്തർക്ക് സദ്യ ലഭിച്ചില്ലെന്ന പരാതിയും മന്ത്രിയുടെ വിമർശനത്തിന് കാരണമായിരുന്നു.
