അഞ്ചരക്കണ്ടി ദന്തൽ കോളജിലെ ഒന്നാം വർഷ ബി.ഡി.എസ്. വിദ്യാർഥി നിതിൻരാജിൻ്റെ ആത്മഹത്യയുമായി ബന്ധപ്പെട്ട കേസിൽ ഒരാൾ കൂടി അറസ്റ്റിലായി. ഉത്തർപ്രദേശിലെ നോയിഡ സ്വദേശിയായ സൗരവ് (24) ആണ് ക്രൈംബ്രാഞ്ചിൻ്റെ പിടിയിലായത്. ലോൺ ആപ്പ് ടെലികോളറായി പ്രവർത്തിച്ചിരുന്ന സൗരവിനെ ആത്മഹത്യാ പ്രേരണക്കുറ്റം ചുമത്തിയാണ് അറസ്റ്റ് ചെയ്തത്. ഇതോടെ കേസിൽ അറസ്റ്റിലായവരുടെ എണ്ണം നാലായി.
ഹരിയാന സ്വദേശിയായ ജയപ്രകാശ്, ഉത്തർപ്രദേശ് സ്വദേശികളായ പ്രശാന്ത് കേവൽ, ഋഷികേശ് തിവാരി എന്നിവരാണ് നേരത്തെ അറസ്റ്റിലായ മറ്റ് പ്രതികൾ. കണ്ണൂർ ക്രൈംബ്രാഞ്ച് എസ്.പി. പി. ബാലകൃഷ്ണൻ നായരുടെ മേൽനോട്ടത്തിൽ ഡിവൈ.എസ്.പി. ജീവൻ ജോർജിൻ്റെ നേതൃത്വത്തിലുള്ള സംഘമാണ് അന്വേഷണം നടത്തുന്നത്. അതേസമയം, രാജിൻ്റെ മരണവുമായി ബന്ധപ്പെട്ട മറ്റൊരു കേസിൽ ഡോ. റാമിൻ്റെ മുൻകൂർ ജാമ്യാപേക്ഷയിൽ ഹൈക്കോടതി വിധി പറയുന്നത് മാറ്റിവച്ചു. കേസുമായി തനിക്ക് യാതൊരു ബന്ധവുമില്ലെന്നും അനാവശ്യമായി കേസിൽ ഉൾപ്പെടുത്തുകയാണെന്നും ജാമ്യാപേക്ഷയിൽ ഡോ. റാം വാദിച്ചു.
ഡോ.റാമിൻ്റെ മുൻകൂർ ജാമ്യാപേക്ഷ നേരത്തെ സെഷൻസ് കോടതി തള്ളിയിരുന്നു. ഇതിനെ തുടർന്നാണ് അദ്ദേഹം ഹൈക്കോടതിയെ സമീപിച്ചത്. കേസുമായി ബന്ധപ്പെട്ട തുടർനടപടികൾ പുരോഗമിക്കുകയാണെന്ന് അന്വേഷണസംഘം അറിയിച്ചു.
