നീറ്റ് ക്രമക്കേടുമായി ബന്ധപ്പെട്ട് സി.ജെ.പി സംഘടിപ്പിച്ച വിദ്യാർത്ഥി പ്രക്ഷോഭത്തെക്കുറിച്ചുള്ള സോഷ്യൽ മീഡിയ പോസ്റ്റിനെ ചൊല്ലി ഉയർന്ന വിവാദത്തിൽ ആദ്യമായി പ്രതികരിച്ച് അവതാരകയും നടിയുമായ പേളി മാണി. തന്റെ വാക്കുകൾ പലരെയും വേദനിപ്പിച്ചതായി മനസ്സിലായെന്നും, തെറ്റ് സംഭവിച്ചിട്ടുണ്ടെങ്കിൽ ആത്മാർത്ഥമായി ക്ഷമ ചോദിക്കുന്നുവെന്നും പേളി യൂട്യൂബ് വീഡിയോയിലൂടെ വ്യക്തമാക്കി.
വിദ്യാർത്ഥികളുടെ പ്രശ്നങ്ങളെക്കുറിച്ച് പ്രതികരിക്കണമെന്ന വലിയ സമ്മർദമുണ്ടായിരുന്ന സാഹചര്യത്തിലാണ് പോസ്റ്റ് പങ്കുവെച്ചതെന്ന് പേളി പറഞ്ഞു. വിദ്യാർത്ഥികൾ സുരക്ഷിതരായിരിക്കണമെന്ന ഉദ്ദേശത്തോടെയാണ് “ഗോ ഹോം” എന്ന പരാമർശം നടത്തിയതെന്നും, സമരം അവസാനിപ്പിച്ച് വീട്ടിലേക്ക് പോകണമെന്ന അർഥത്തിലായിരുന്നില്ല അതെന്നും അവർ വിശദീകരിച്ചു.
പോസ്റ്റിന് പിന്നാലെ പ്രതീക്ഷിക്കാത്ത തരത്തിലുള്ള വ്യാഖ്യാനങ്ങളും വിമർശനങ്ങളും ഉയർന്നുവന്നതായും, തുടർന്ന് വിശദീകരണമായി സ്റ്റോറി പങ്കുവെച്ചെന്നും പേളി പറഞ്ഞു. വിമർശിച്ച ഒരാളെ “തോറ്റ സംവിധായകൻ” എന്ന് വിശേഷിപ്പിച്ച സ്റ്റോറി പങ്കുവെച്ചത് തെറ്റായിപ്പോയെന്നും, അത് ഉടൻ തന്നെ പിൻവലിച്ചെന്നും അതിന് മാപ്പ് ചോദിക്കുന്നതായും അവർ വ്യക്തമാക്കി.
തന്നെ ഒരു പ്രത്യേക രാഷ്ട്രീയ പാർട്ടിയുമായി ബന്ധപ്പെടുത്തി ചിത്രീകരിക്കാൻ ശ്രമിച്ചുവെന്നും, താൻ യാതൊരു രാഷ്ട്രീയ പാർട്ടിയുടെയും ഭാഗമല്ലെന്നും പേളി പറഞ്ഞു. വിവിധ രാഷ്ട്രീയ കക്ഷികളിലുള്ളവർ തൻ്റെ സുഹൃത്തുക്കളാണെന്നും, ഒരു നിറത്തിൻ്റെ പേരിൽ തന്നെ വിലയിരുത്തരുതെന്നും അവർ അഭ്യർഥിച്ചു.
സംവിധായകൻ സിബി മലയിൽക്കെതിരെ അപമാനകരമായി സംസാരിച്ചിട്ടില്ലെന്നും, അദ്ദേഹം മലയാള സിനിമയിലെ മികച്ച സംവിധായകരിൽ ഒരാളാണെന്നും അദ്ദേഹത്തിൻ്റെ വലിയ ആരാധികയാണെന്നും പേളി കൂട്ടിച്ചേർത്തു. പൊതുജനങ്ങൾക്കു മുന്നിൽ സംസാരിക്കുമ്പോൾ ഓരോ വാക്കിനും ഉത്തരവാദിത്തമുണ്ടെന്ന് ഈ സംഭവത്തിലൂടെ തിരിച്ചറിഞ്ഞതായും, തെറ്റുകൾ തിരുത്താൻ എപ്പോഴും തയ്യാറാണെന്നും പേളി മാണി പറഞ്ഞു.
