ബെംഗളൂരുവിലെ വർധിച്ചുവരുന്ന ജനസംഖ്യയും അടിസ്ഥാനസൗകര്യങ്ങളിലെ സമ്മർദവും കുറയ്ക്കാൻ കർണാടകയിൽ ‘രണ്ടാം ബെംഗളൂരു’ വികസിപ്പിക്കുന്ന കാര്യം ഗൗരവമായി പരിഗണിക്കണമെന്ന് നീതി ആയോഗ് വൈസ് ചെയർമാൻ അശോക് കുമാർ ലാഹിരി നിർദേശിച്ചു. സെപ്റ്റംബർ 2ന് മുഖ്യമന്ത്രി ഡി.കെ. ശിവകുമാറുമായി ബെംഗളൂരുവിൽ നടത്തിയ കൂടിക്കാഴ്ചയിലാണ് നിർദേശം മുന്നോട്ടുവച്ചത്.
‘വികസിത് കർണാടക @2047’ സംബന്ധിച്ച ചർച്ചയ്ക്കിടെയായിരുന്നു നിർദേശം. വേഗത്തിൽ വളരാനുള്ള വലിയ സാധ്യത കർണാടകയ്ക്കുണ്ടെന്നും, സംസ്ഥാനത്തിൻ്റെ വികസനം രാജ്യത്തിൻ്റെ സാമ്പത്തിക വളർച്ചയ്ക്കും നിർണായകമാണെന്നും ലാഹിരി പറഞ്ഞു.
നിലവിൽ ഐടി, സ്റ്റാർട്ടപ്പുകൾ, വിദേശ നിക്ഷേപം, കയറ്റുമതി തുടങ്ങിയ മേഖലകളിലെ വലിയൊരു പങ്ക് ബെംഗളൂരുവിൽ കേന്ദ്രീകരിച്ചിരിക്കുകയാണ്. മറ്റൊരു പ്രധാന നഗരകേന്ദ്രം വികസിപ്പിക്കുന്നതിലൂടെ തൊഴിൽ, നിക്ഷേപം, വ്യവസായം, അടിസ്ഥാനസൗകര്യങ്ങൾ എന്നിവ സംസ്ഥാനത്തിൻ്റെ മറ്റ് ഭാഗങ്ങളിലേക്കും വ്യാപിപ്പിക്കാനാകും.
നീതി ആയോഗിൻ്റെ നിർദേശം ഉൾപ്പെടുത്തി സമഗ്രമായ പദ്ധതി തയ്യാറാക്കുമെന്ന് മുഖ്യമന്ത്രി ഡി.കെ. ശിവകുമാർ അറിയിച്ചു. മറ്റ് സംസ്ഥാനങ്ങൾ സമാനമായി നടപ്പാക്കിയ പദ്ധതികളും പരിശോധിക്കുമെന്ന് അദ്ദേഹം വ്യക്തമാക്കി.
കർണാടകയുടെ വലിയ വരണ്ട പ്രദേശങ്ങളിൽ കാർഷിക ഉൽപ്പാദനം വർധിപ്പിക്കുന്നതിനുള്ള പദ്ധതികൾ ആവിഷ്കരിക്കണമെന്നും ലാഹിരി നിർദേശിച്ചു. അതേസമയം, ബെംഗളൂരുവിന് പകരമായി ഏത് നഗരത്തെയാണ് വികസിപ്പിക്കേണ്ടതെന്ന് ഇതുവരെ ഔദ്യോഗികമായി പ്രഖ്യാപിച്ചിട്ടില്ല.
2025–26ൽ കർണാടകയുടെ സംസ്ഥാന ആഭ്യന്തര ഉൽപ്പാദനം ₹32.81 ലക്ഷം കോടിയിലെത്തിയെന്നും 8.1% വളർച്ച രേഖപ്പെടുത്തിയെന്നും യോഗത്തിൽ ഉദ്യോഗസ്ഥർ അറിയിച്ചു.
