ഫിഫ ലോകകപ്പ് 2026 ഫൈനൽ മത്സരം വിദ്യാർഥികൾക്ക് കാണാൻ അവസരമൊരുക്കി കേരളത്തിന് പിന്നാലെ മേഘാലയ, മണിപ്പൂർ സംസ്ഥാന സർക്കാരുകളും പ്രത്യേക തീരുമാനം പ്രഖ്യാപിച്ചു.
പുലർച്ചെയാണ് ലോകകപ്പ് ഫൈനൽ നടക്കുന്നതിനാൽ വിദ്യാർഥികൾക്ക് മത്സരം ആസ്വദിക്കാനായി വിദ്യാഭ്യാസ സ്ഥാപനങ്ങൾക്ക് അവധി നൽകാനാണ് തീരുമാനം. ഫുട്ബോൾ പ്രേമികളായ വിദ്യാർഥികളുടെ ആവശ്യം പരിഗണിച്ചാണ് സംസ്ഥാന സർക്കാരുകളുടെ നടപടി.
നേരത്തെ കേരള സർക്കാർ തിങ്കളാഴ്ച സംസ്ഥാനത്തെ പ്രൊഫഷണൽ കോളജുകൾ ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും അവധി പ്രഖ്യാപിച്ചിരുന്നു. മുൻകൂട്ടി നിശ്ചയിച്ച പരീക്ഷകൾക്ക് മാത്രമാണ് അവധിയിൽ ഇളവ് നൽകിയിരിക്കുന്നത്.
ഫുട്ബോളിന് വലിയ ജനപ്രീതിയുള്ള മേഘാലയയും മണിപ്പൂരും സമാനമായ തീരുമാനം സ്വീകരിച്ചതോടെ ലോകകപ്പ് ഫൈനൽ ആവേശം രാജ്യത്തിൻ്റെ വിവിധ ഭാഗങ്ങളിലേക്കും വ്യാപിച്ചിരിക്കുകയാണ്. വിദ്യാർഥികൾക്കും ഫുട്ബോൾ ആരാധകർക്കും ആഘോഷമാക്കാൻ കഴിയുന്ന തരത്തിലാണ് സംസ്ഥാന സർക്കാരുകളുടെ ഈ പ്രത്യേക തീരുമാനം.
