കർണാടകയിലെ വരൾച്ചബാധിതരായ അർഹരായ എല്ലാ കർഷകർക്കും കുറഞ്ഞത് 5,000 രൂപ വീതം ധനസഹായം നൽകുമെന്ന് ഉപമുഖ്യമന്ത്രി ജി. പരമേശ്വര വ്യക്തമാക്കി. ആദ്യ ഗഡുവായി 2,000 രൂപയോ 2,500 രൂപയോ ലഭിച്ച കർഷകർക്ക് ബാക്കിയുള്ള തുക തുടർന്നുള്ള ഗഡുക്കളായി നൽകുമെന്നും അദ്ദേഹം അറിയിച്ചു.
ആദ്യ ഗഡുവായി പ്രതീക്ഷിച്ച 2,500 രൂപയ്ക്ക് പകരം ചില കർഷകർക്ക് 2,000 രൂപ മാത്രമാണ് ലഭിച്ചതെന്ന പരാതികളോട് പ്രതികരിക്കുകയായിരുന്നു അദ്ദേഹം. ഇതുവരെ നൽകിയ തുക അന്തിമ സഹായമല്ലെന്നും അദ്ദേഹം വ്യക്തമാക്കി. നിരവധി കർഷകർ കുറഞ്ഞ തുക ലഭിച്ചതിനെതിരെ ആശങ്ക അറിയിച്ചിരുന്നു. വിഷയത്തിൽ കോൺഗ്രസ് സർക്കാരിനെതിരെ പ്രതിപക്ഷമായ ബിജെപിയും വിമർശനമുന്നയിച്ചിരുന്നു.
“വരൾച്ച ബാധിച്ച അർഹരായ ഓരോ കർഷകനും കുറഞ്ഞത് 5,000 രൂപ നൽകാനാണ് സർക്കാർ തീരുമാനിച്ചിരിക്കുന്നത്. ഈ ഉറപ്പ് സർക്കാർ പാലിക്കും,” പരമേശ്വര പ്രസ്താവനയിൽ പറഞ്ഞു.
ഒക്ടോബർ 23-ന് പുറപ്പെടുവിച്ച ഉത്തരവിലൂടെ അർഹരായ ഓരോ കർഷകനും ആദ്യ ഗഡുവായി 2,500 രൂപ വീതം നൽകാൻ സർക്കാർ അനുമതി നൽകിയിരുന്നു. ഇതിൻ്റെ ഭാഗമായി നവംബർ 5-ന് യാദ്ഗിർ ജില്ലയിലെ 1,06,462 കർഷകർക്ക് 17.43 കോടി രൂപ വിതരണം ചെയ്യുന്ന പദ്ധതിക്ക് സർക്കാർ തുടക്കമിട്ടതായും അദ്ദേഹം പറഞ്ഞു.
കേന്ദ്ര സർക്കാർ തയ്യാറാക്കിയ SDRF/NDRF മാർഗനിർദേശങ്ങൾ പ്രകാരം കൃഷിഭൂമിയുടെ വിഭാഗവും വിസ്തൃതിയും അടിസ്ഥാനമാക്കിയാണ് ഇൻപുട്ട് സബ്സിഡി നിശ്ചയിക്കുന്നത്. ഇതനുസരിച്ച് മഴയെ ആശ്രയിച്ചുള്ള കൃഷിക്ക് കുറഞ്ഞത് 1,500 രൂപയും ജലസേചന സൗകര്യമുള്ള കൃഷിക്ക് 2,600 രൂപയും ദീർഘകാല വിളകൾക്ക് 3,200 രൂപയുമാണ് നിശ്ചയിച്ചിട്ടുള്ളതെന്ന് പരമേശ്വര വിശദീകരിച്ചു.
എന്നാൽ ഈ മാനദണ്ഡങ്ങൾക്കപ്പുറം പോയി ഭൂമിയുടെ വിസ്തൃതി പരിഗണിക്കാതെ അർഹരായ എല്ലാ കർഷകർക്കും കുറഞ്ഞത് 5,000 രൂപ ഉറപ്പാക്കാൻ മുഖ്യമന്ത്രി സിദ്ധരാമയ്യയും താനും തീരുമാനിച്ചതായി അദ്ദേഹം പറഞ്ഞു.
“അര ഏക്കറിൽ കൃഷി ചെയ്യുന്ന കർഷകനും നിരവധി ഏക്കറിൽ കൃഷി ചെയ്യുന്ന കർഷകനും ഒരേ വരൾച്ചയും അനിശ്ചിതത്വവും സാമ്പത്തിക പ്രതിസന്ധിയുമാണ് നേരിടുന്നത്. ഒരു കർഷകൻ്റെ ഭൂമിയുടെ വിസ്തൃതി സർക്കാരിൻ്റെ കരുണയും കരുതലും നിർണയിക്കാനുള്ള മാനദണ്ഡമാകരുത്,” അദ്ദേഹം പറഞ്ഞു.
ആദ്യ ഗഡുവായി 2,000 രൂപ ലഭിച്ച കർഷകർക്ക് ബാക്കി 3,000 രൂപയും 2,500 രൂപ ലഭിച്ചവർക്ക് ബാക്കി 2,500 രൂപയും നൽകുമെന്നും അദ്ദേഹം വ്യക്തമാക്കി.
5,000 രൂപയാണ് കുറഞ്ഞ ധനസഹായം. വിളനാശത്തിൻ്റെ തോതും ബാധകമായ മാനദണ്ഡങ്ങളും അനുസരിച്ച് അർഹരായ കർഷകർക്ക് 5,000 രൂപ മുതൽ 60,000 രൂപ വരെ വർധിപ്പിച്ച ഇൻപുട്ട് സബ്സിഡി ലഭിക്കുമെന്നും അദ്ദേഹം കൂട്ടിച്ചേർത്തു.
ധനസഹായ വിതരണത്തിൽ സുതാര്യത ഉറപ്പാക്കാനും ബാക്കിയുള്ള തുക വേഗത്തിൽ വിതരണം ചെയ്യാനും ഉദ്യോഗസ്ഥർക്ക് നിർദേശം നൽകിയിട്ടുണ്ടെന്നും ഉപമുഖ്യമന്ത്രി അറിയിച്ചു.
“സർക്കാർ മാർഗനിർദേശങ്ങൾ കർഷകരുടെ താൽപര്യങ്ങൾ സംരക്ഷിക്കാനായിരിക്കണം, അവർക്ക് ആശ്വാസം നൽകുന്നതിന് തടസ്സമാകരുത്. നിലവിലുള്ള മാനദണ്ഡങ്ങൾ കർഷകരുടെ ദുരിതം പരിഹരിക്കാൻ പര്യാപ്തമല്ലെങ്കിൽ അവരുടെ താൽപര്യങ്ങൾ സംരക്ഷിക്കാൻ ആവശ്യമായ തീരുമാനങ്ങൾ സർക്കാർ കൈക്കൊള്ളും,” അദ്ദേഹം പറഞ്ഞു.
കിംവദന്തികളിലും തെറ്റായ വിവരങ്ങളിലും വിശ്വസിക്കരുതെന്ന് കർഷകരോട് അഭ്യർഥിച്ച പരമേശ്വര, രാഷ്ട്രീയ നേട്ടത്തിനായി ഈ വിഷയം ഉപയോഗിക്കരുതെന്ന് പ്രതിപക്ഷ നേതാക്കളോടും ആവശ്യപ്പെട്ടു.
അർഹതയുണ്ടായിട്ടും കുറഞ്ഞ ധനസഹായം ലഭിച്ച കർഷകരുടെ പരാതികൾ പരിശോധിക്കാൻ സർക്കാർ തയ്യാറാണെന്നും അദ്ദേഹം വ്യക്തമാക്കി. “നമ്മുടെ കർഷകർക്ക് ആവശ്യം രാഷ്ട്രീയ ആരോപണങ്ങളല്ല. സമയബന്ധിതമായ സഹായവും സാമ്പത്തിക സുരക്ഷിതത്വവും സർക്കാർ തങ്ങൾക്കൊപ്പമുണ്ടെന്ന ആത്മവിശ്വാസവുമാണ്,” അദ്ദേഹം പറഞ്ഞു.
