അമേരിക്കൻ പ്രസിഡൻ്റ് ട്രംപിൻ്റെ ഉപദേശകനും ടെസ്ല മേധാവിയുമായ ഇലോൺ മസ്ക് വീണ്ടും അച്ഛനായി. തൻ്റെ പതിനാലാമത്തെ കുഞ്ഞിനെയാണ് മസ്ക് വരവേറ്റത്. ന്യൂറാലിങ്ക് ഡയറക്ടറും മസ്കിൻ്റെ പങ്കാളിമായ ഷിവോൺ സിലിസാണ് കുഞ്ഞിന് ജന്മം നൽകിയത്. ഇരുവരുടെയും നാലാമത്തെ കുഞ്ഞാണ് ഇത്.
സെൽഡൺ ലൈക്കർഗസ് എന്നാണ് കുഞ്ഞിന് പേര് നൽകിയത്. 2021ലാണ് ഇവർക്ക് ആദ്യമായി കുഞ്ഞ് ജനിച്ചത്. ഇരട്ടക്കുട്ടികളെയാണ് ഇരുവരും ആദ്യമായി വരവേറ്റത്. സ്ട്രൈഡർ, ആസ്യൂർ എന്നാണ് ഇവരുടെ പേരുകൾ. മസ്കും മറ്റൊരു പങ്കാളിയായ ഗായിക ഗ്രിംസും തങ്ങളുടെ മകളായ എക്സാ ഡാർക്ക് സിഡാറെലിനെ സ്വീകരിച്ച് വെറും ആഴ്കൾക്ക് മുൻപായിരുന്നു ഇത്.
ഗ്രിംസിൽ മൂന്ന് കുഞ്ഞുങ്ങളാണ് മസ്കിനുള്ളത്. എക്സ് എഇ എ-12, എക്സാ ഡാർക്ക് സിഡാറെൽ, ടെക്നോ മെക്കാനിക്കസ് എന്നിങ്ങനെയാണ് മക്കളുടെ പേരുകൾ. 3 പങ്കാളികളിലായി മസ്കിന് 12 കുട്ടികളാണിപ്പോഴുള്ളത്. മുൻഭാര്യ ജസ്റ്റിൻ വിൽസണിൽ നിന്നാണ് 2002ൽ മസ്കിന് ആദ്യ കുട്ടിയായ നെവാഡ അലക്സാണ്ടർ ജനിച്ചത്. എന്നാൽ പത്ത് ആഴ്ചകൾക്ക് ശേഷം മരണപ്പെട്ടു.
പിന്നാലെയാണ് ഇരുവർക്കും വിവിയൻ, ഗ്രിഫിൻ എന്നീ ഇരട്ടകളും ട്രിപ്പറ്റുകളായ കായ് സാക്സൺ, ഡമിയൻ എന്നിവരും ജനിക്കുന്നത്. ഇതിനിടെ, മസ്കിൻ്റെ 13-ാമത്തെ കുഞ്ഞിന് ജന്മം നൽകിയെന്ന് അവകാശപ്പെട്ട് എഴുത്തുകാരിയും ഇൻഫ്ലുവൻസറുമായ ആഷ്ലി സെയ്ൻ്റ് ക്ലയർ രംഗത്തെത്തിയിരുന്നു. ആഷിയുടെ വാദങ്ങളെ മസ്ക് തളുകയോ അംഗീകരിക്കുകയോ ചെയ്തിട്ടില്ല.
