കർണാടക മുഖ്യമന്ത്രി ഡി.കെ. ശിവകുമാർ യശ്വന്ത്പുര APMC മാർക്കറ്റിൽ പുലർച്ചെ അപ്രതീക്ഷിത സന്ദർശനം നടത്തി. മാർക്കറ്റിലെത്തിയ മുഖ്യമന്ത്രി ഉള്ളി, ഉരുളക്കിഴങ്ങ്, ഇഞ്ചി, വെളുത്തുള്ളി തുടങ്ങിയവയുടെ മൊത്തവ്യാപാര കേന്ദ്രങ്ങൾ സന്ദർശിച്ച് കർഷകർ, വ്യാപാരികൾ, ഇടനിലക്കാർ, ഹമാലിമാർ, വനിതാ തൊഴിലാളികൾ എന്നിവരുമായി നേരിട്ട് സംസാരിച്ചു.
കർഷകരുടെ വിളവിൻ്റെ അളവ്, വില, കമ്മീഷൻ, ഗതാഗതച്ചെലവ്, വിപണിയിലെ മറ്റ് കുറവുകൾ തുടങ്ങിയ കാര്യങ്ങൾ മുഖ്യമന്ത്രി ചോദിച്ചറിഞ്ഞു. ഉള്ളി കർഷകർ ഗതാഗതച്ചെലവ് വർധിച്ചതോടെ വരുമാനത്തിൽ വലിയ കുറവുണ്ടാകുന്നതായി പരാതിപ്പെട്ടു. മഴക്കുറവ് മൂലം സാധാരണ ലഭിക്കുന്ന 150–200 ചാക്ക് വരെ വരുന്ന വിളവ് ഇത്തവണ ഏക്കറിന് ഏകദേശം 50 ചാക്കായി കുറഞ്ഞതായും കർഷകർ അറിയിച്ചു.
മറ്റ് ചില മാർക്കറ്റുകളിൽ കിലോയ്ക്ക് ₹8 മുതൽ ₹10 വരെ കമ്മീഷൻ ഈടാക്കുന്നതായും കർഷകർ പരാതിപ്പെട്ടു. യശ്വന്ത്പുര APMCയിൽ ഇത്തരം കമ്മീഷൻ ഈടാക്കാത്തതിനാൽ ഇവിടെ ഉൽപ്പന്നങ്ങൾ എത്തിക്കാൻ താൽപര്യമാണെന്നും അവർ പറഞ്ഞു. തൂക്കത്തിൽ കൃത്രിമം നടക്കുന്നുണ്ടോയെന്നും മുഖ്യമന്ത്രി പരിശോധിച്ചു. അമിത നിരക്ക് ഈടാക്കുന്ന വ്യാപാരികൾക്കെതിരെ നടപടി സ്വീകരിക്കാനും തൂക്കയന്ത്രങ്ങളിൽ കൃത്രിമം നടക്കുന്നില്ലെന്ന് ഉറപ്പാക്കാനും അദ്ദേഹം ഉദ്യോഗസ്ഥർക്ക് നിർദേശം നൽകി.
മാർക്കറ്റിലെ വനിതാ തൊഴിലാളികളുമായും മുഖ്യമന്ത്രി സംസാരിച്ചു. അവരുടെ ജോലി, വേതനം, തൊഴിൽ സാഹചര്യങ്ങൾ എന്നിവ ചോദിച്ചറിഞ്ഞു. ഹമാലിമാർക്കൊപ്പം റോഡരികിലെ ചെറിയ ഹോട്ടലിൽ ഇരുന്ന് പ്രഭാതഭക്ഷണം കഴിച്ചതും ശ്രദ്ധേയമായി.
സന്ദർശനത്തിനിടെ മാർക്കറ്റിൽ കുട്ടികൾ ജോലി ചെയ്യുന്നതും മുഖ്യമന്ത്രിയുടെ ശ്രദ്ധയിൽപ്പെട്ടു. തുടർന്ന് അധികൃതർക്ക് നടപടി സ്വീകരിക്കാൻ നിർദേശം നൽകി. കർഷകരുടെ പ്രശ്നങ്ങൾ നേരിട്ട് മനസ്സിലാക്കാനാണ് അപ്രതീക്ഷിത സന്ദർശനം നടത്തിയതെന്ന് ശിവകുമാർ പറഞ്ഞു. APMCയിലെ അടിസ്ഥാന സൗകര്യങ്ങളുടെ കുറവുകൾ ഉൾപ്പെടെയുള്ള പ്രശ്നങ്ങൾ പരിശോധിച്ച് പരിഹാരം കാണുമെന്നും അദ്ദേഹം വ്യക്തമാക്കി.
