ഉത്തർപ്രദേശിലെ സരയൂയിൽ കുളിക്കുന്നതിനിടെ യുവാവിനെ മുതല ആക്രമിച്ച് നദിയിലേക്ക് വലിച്ചിഴച്ചുകൊണ്ടുപോയി. നോയിഡ സ്വദേശിയായ ദീപക് ശർമയെയാണ് കാണാതായത്. ഭാര്യാമാതാവായ ഊർമിള ദേവിയുടെ മരണത്തെത്തുടർന്ന് ദീപക് ശർമ, ഗോണ്ട ജില്ലയിലെ ഉമ്രി ഗ്രാമത്തിലേക്ക് പോയിരുന്നു.
നദീതീരത്ത് ചിതയൊരുക്കാൻ കുഴിയെടുക്കാൻ സഹായിച്ച ശേഷം ദീപക് ശർമ കുളിക്കാനായി നദിയിലിറങ്ങി. പെട്ടെന്ന് ഒരു മുതല അദ്ദേഹത്തിന്‍റെ തലയിൽ കടിച്ച് വെള്ളത്തിലേക്ക് വലിച്ചിഴച്ചു കൊണ്ടുപോകുകയായിരുന്നു.
നദിയിലിറങ്ങരുതെന്ന് ദീപക് ശർമയോട് പലരും ഉപദേശിച്ചിരുന്നുവെന്നും അദ്ദേഹം അത് അവഗണിക്കുകയായിരുന്നുവെന്നും ദൃക്‌സാക്ഷിയായ രാജേഷ് ശുക്ല പറഞ്ഞു. സമീപത്തുണ്ടായിരുന്നവരുടെ കരച്ചിൽ കേട്ട് ഗ്രാമീണർ തിരച്ചിൽ നടത്തിയെങ്കിലും ദീപക് ശർമയെ കണ്ടെത്താനായില്ല. അപകടവിവരമറിഞ്ഞ് പോലീസും ഉദ്യോഗസ്ഥരും ഉടൻ തന്നെ സ്ഥലത്തെത്തി. തുടർന്ന് തിരച്ചിൽ നടത്തിയെങ്കിലും ഫലമുണ്ടായില്ല. തിരച്ചിലിനായി ലക്നോവിൽ നിന്നും സംസ്ഥാന ദുരന്ത നിവാരണ സേനയെ സ്ഥലത്തേക്ക് വിളിച്ചുവരുത്തിയിട്ടുണ്ട്.
