പതിനാറാം കേരള നിയമസഭയുടെ സ്പീക്കർ സ്ഥാനത്തേക്ക് മുൻ മന്ത്രിയും മുതിർന്ന സിപിഎം നേതാവുമായ എ.സി. മൊയ്തീൻ ഇടതുമുന്നണി സ്ഥാനാർത്ഥിയാകും. നാളെയാണ് പുതിയ സഭയുടെ സ്പീക്കർ, ഡെപ്യൂട്ടി സ്പീക്കർ പദവികളിലേക്കുള്ള തിരഞ്ഞെടുപ്പ് നടക്കുക. യുഡിഎഫ് (UDF) തങ്ങളുടെ സ്പീക്കർ സ്ഥാനാർത്ഥിയായി തിരുവഞ്ചൂർ രാധാകൃഷ്ണനെയും ഡെപ്യൂട്ടി സ്പീക്കർ സ്ഥാനത്തേക്ക് ഷാനിമോൾ ഉസ്മാനെയും രംഗത്തിറക്കും.
ബിജെപിയിൽ നിന്ന് ചാത്തന്നൂർ എംഎൽഎ ഗോപകുമാറും സ്പീക്കർ സ്ഥാനത്തേക്ക് മത്സരിക്കുമെന്ന് പ്രഖ്യാപിച്ചതോടെ നാളത്തെ തിരഞ്ഞെടുപ്പ് ത്രികോണ മത്സരത്തിന് വഴിയൊരുക്കിയിരിക്കുകയാണ്. പുതിയ അംഗങ്ങളുടെ സത്യപ്രതിജ്ഞ പൂർത്തിയായതിന് പിന്നാലെയാണ് മുന്നണികൾ തങ്ങളുടെ സ്ഥാനാർത്ഥികളെ ഔദ്യോഗികമായി പ്രഖ്യാപിച്ചത്.
