സ്വകാര്യ ബസുകൾക്ക് ടിക്കറ്റ് ഇതര വരുമാനം കണ്ടെത്താൻ പുതിയ വഴിതുറന്ന് സംസ്ഥാന സർക്കാർ. സ്വകാര്യ ബസുകളുടെ അകത്തും പുറത്തും പരസ്യങ്ങൾ പതിപ്പിക്കാൻ അനുമതി നൽകുന്നതായി ഗതാഗത വകുപ്പ് മന്ത്രി സി.പി. ജോൺ പ്രഖ്യാപിച്ചു.
സ്വകാര്യ ബസ് ഉടമകൾ ഉന്നയിച്ചിരുന്ന സാമ്പത്തിക പ്രതിസന്ധി പരിഹരിക്കാനാണ് പുതിയ തീരുമാനം. സർക്കാർ നടപ്പാക്കിയ പ്രിയദർശിനി സൗജന്യ യാത്രാ പദ്ധതിക്ക് പിന്നാലെ സ്വകാര്യ ബസ് മേഖലയിലുണ്ടായ വരുമാന നഷ്ടം പരിഹരിക്കുന്നതിനുള്ള നടപടികളുടെ ഭാഗമായാണ് പരസ്യാനുമതി നൽകുന്നതെന്ന് മന്ത്രി വ്യക്തമാക്കി.
പ്രിയദർശിനി പദ്ധതി സ്വകാര്യ ബസ് മേഖലയെ എത്രത്തോളം ബാധിച്ചുവെന്ന് പഠിക്കാൻ ബി. പത്മകുമാർ ചെയർമാനായും ഡോ. ശ്രീദേവി വൈസ് ചെയർപേഴ്സണായും ഒരു സമിതിയെ നിയോഗിച്ചതായും 45 ദിവസത്തിനകം റിപ്പോർട്ട് ലഭിക്കുമെന്നും മന്ത്രി അറിയിച്ചു.
പ്രിയദർശിനി പദ്ധതി മൂലമുണ്ടായ വരുമാന നഷ്ടം മറികടക്കാൻ ടിക്കറ്റ് ഇതര വരുമാന മാർഗങ്ങൾ കണ്ടെത്തണമെന്ന് സർക്കാർ നേരത്തേ സ്വകാര്യ ബസ് ഉടമകളോട് നിർദേശിച്ചിരുന്നു. ഇതിൻ്റെ തുടർച്ചയായാണ് ഇപ്പോൾ സ്വകാര്യ ബസുകളിലും പരസ്യങ്ങൾ അനുവദിച്ചിരിക്കുന്നത്. കെഎസ്ആർടിസി ബസുകളിൽ നേരത്തേ പരസ്യങ്ങൾ ഉണ്ടായിരുന്നെങ്കിലും, സ്വകാര്യ ബസുകളുടെ പുറത്ത് പരസ്യം പതിപ്പിക്കാൻ അനുമതി ലഭിക്കുന്നത് ആദ്യമായാണ്.
