ബന്നാർഘട്ട റോഡുമായി ബന്ധിപ്പിക്കുന്ന നമ്മ മെട്രോയുടെ 7.5 കിലോമീറ്റർ ദൈർഘ്യമുള്ള എലിവേറ്റഡ് പിങ്ക് ലൈൻ നവംബർ 14 മുതൽ പൊതുജനങ്ങൾക്കായി സർവീസ് ആരംഭിക്കുമെന്ന് ഗ്രേറ്റർ ബെംഗളൂരു വികസന മന്ത്രി കൃഷ്ണ ബൈര ഗൗഡ അറിയിച്ചു. നവംബർ 13 വെള്ളിയാഴ്ച പ്രധാനമന്ത്രി നരേന്ദ്ര മോദി മെട്രോ സർവീസ് ഫ്ലാഗ് ഓഫ് ചെയ്യുമെന്നും അദ്ദേഹം വാർത്താസമ്മേളനത്തിൽ വ്യക്തമാക്കി.
ഉച്ചയ്ക്ക് 12.30ന് ഡയറി സർക്കിളിന് സമീപമുള്ള ഫയർ സ്റ്റേഷനിൽ എത്തുന്ന പ്രധാനമന്ത്രി, തൊട്ടടുത്തുള്ള തവരേക്കരെ മെട്രോ സ്റ്റേഷനിലെത്തി സർവീസ് ഉദ്ഘാടനം ചെയ്യും. തുടർന്ന് മെട്രോയിൽ ഐഐഎംബി ബിലെകഹള്ളി സ്റ്റേഷനിലേക്ക് യാത്ര ചെയ്ത് ഐഐഎംബി ഓഡിറ്റോറിയത്തിൽ നടക്കുന്ന ഉദ്ഘാടന ചടങ്ങിൽ പങ്കെടുക്കും.
ആദ്യഘട്ടത്തിൽ അഞ്ച് ട്രെയിനുകളാണ് പിങ്ക് ലൈനിൽ സർവീസ് നടത്തുക. ഇതിൽ നാലെണ്ണം സർവീസിനും ഒരെണ്ണം സ്റ്റാൻഡ്‌ബൈ ആയും വിന്യസിക്കും. തിരക്കേറിയ സമയങ്ങളിൽ എട്ട് മിനിറ്റ് ഇടവേളയിലായിരിക്കും ട്രെയിനുകൾ സർവീസ് നടത്തുക. സിഗ്നലിങ് സംവിധാനം സ്ഥിരത കൈവരിക്കുന്നതിനും യാത്രക്കാരുടെ തിരക്ക് വിലയിരുത്തുന്നതിനും അനുസരിച്ച് സർവീസുകളുടെ ഇടവേള കുറയ്ക്കുമെന്ന് മന്ത്രി അറിയിച്ചു.
7.5 കിലോമീറ്റർ മാത്രമാണ് ദൈർഘ്യമെങ്കിലും പിങ്ക് ലൈനിന് മികച്ച യാത്രക്കാരുടെ പിന്തുണ ലഭിക്കുമെന്നാണ് പ്രതീക്ഷയെന്ന് മന്ത്രി പറഞ്ഞു. ജയദേവ ആശുപത്രി മെട്രോ സ്റ്റേഷനിൽ യെല്ലോ ലൈനിലേക്ക് മാറിക്കയറാനുള്ള സൗകര്യമുണ്ടാകും. ഇതുവഴി ഇലക്ട്രോണിക്സ് സിറ്റി, എച്ച്എസ്ആർ ലേഔട്ട്, ജയനഗർ തുടങ്ങിയ സ്ഥലങ്ങളിലേക്ക് യാത്ര ചെയ്യാം.
ബന്നാർഘട്ട റോഡ് മെട്രോ ലൈൻ പ്രവർത്തനം ആരംഭിക്കുന്നതോടെ ബെംഗളൂരുവിലെ മെട്രോ ശൃംഖലയുടെ ആകെ ദൈർഘ്യം 103.6 കിലോമീറ്ററാകും. രാജ്യത്തെ ഏറ്റവും വലിയ രണ്ടാമത്തെ മെട്രോ ശൃംഖലയായി ബെംഗളൂരു മാറുമെന്നും മന്ത്രി പറഞ്ഞു.
