ലിഫ്റ്റ് ചോദിച്ച് കയറിയ ബൈക്കില് ലോറി ഇടിച്ചുണ്ടായ അപകടത്തില് 2യുവതി മരിച്ചു. എറണാകുളം പുറയാര് മഠത്തിപ്പറമ്പില് ഹരിപ്രസാദിന്റെ മകള് നന്ദനയാണ് മരിച്ചത്. ബൈക്ക് ഓടിച്ചിരുന്ന അത്താണി സ്വദേശി അശ്വിന് ആന്റണി (22)യെ ഇടപ്പള്ളി അമൃത ആശുപത്രിയില് പ്രവേശിപ്പിച്ചു.
ആലുവയ്ക്ക് സമീപം തിങ്കളാഴ്ച രാവിലെ 10.30 ന് മുട്ടത്തിനും അമ്പാട്ടുകാവിനും ഇടയില്വെച്ചായിരുന്നു അപകടം നടന്നത്. റോഡിന് സമീപം നിര്ത്തിയിട്ടിരുന്ന ലോറി അലക്ഷ്യമായി വലത്തേക്ക് വെട്ടിച്ച് മുന്നോട്ടെടുത്തപ്പോള് പിന്നില്നിന്ന് വന്ന ബൈക്കില് തട്ടി.
തൊട്ടുപിന്നാലെ വന്ന കാര് ബൈക്കില് ഇടിക്കുകയും നിയന്ത്രണം നഷ്ടപ്പെട്ട ബൈക്ക് മറിയുകയുമായിരുന്നു. റോഡില് തലയിടിച്ചാണ് നന്ദന വീണത്. അബോധാവസ്ഥയിലായ നന്ദനയെ ഉടന് തന്നെ കളമശ്ശേരി മെഡിക്കല് കോളേജ് ആശുപത്രിയില് പ്രവേശിപ്പിച്ചു.
12.25 ഓടെ മരണം സംഭവിക്കുകയായിരുന്നു. അത്താണി നീരജ എയര്ലൈന്സ് ഇന്സ്റ്റിറ്റ്യൂട്ടിലെ ജീവനക്കാരിയായിരുന്നു നന്ദന. മൃതദേഹം നിലവില് കളമശ്ശേരി മെഡിക്കല് കോളേജിലാണ്. പോസ്റ്റ്മോര്ട്ടത്തിന് ശേഷം ബന്ധുക്കള്ക്ക് വിട്ടുനല്കും.
