സംസ്ഥാനത്ത് പി.എം. ശ്രീ പദ്ധതിയുമായി മുന്നോട്ടുപോകുമെന്ന് യു.ഡി.എഫ് കൺവീനർ അടൂർ പ്രകാശ് അറിയിച്ചു. കേന്ദ്രവുമായി ഒപ്പുവെച്ച ധാരണാപത്രത്തിൽ നിന്ന് പിൻമാറാനാകില്ലെന്നും കേന്ദ്രഫണ്ട് ലഭ്യമാക്കുന്നതിനുള്ള നടപടികളുമായി സർക്കാർ മുന്നോട്ടുപോകുമെന്നും അദ്ദേഹം വ്യക്തമാക്കി.
പദ്ധതിയിൽ ഉൾപ്പെടുത്തേണ്ട വിദ്യാഭ്യാസ സ്ഥാപനങ്ങൾ ഏതൊക്കെയാണെന്നത് സർക്കാർ തീരുമാനിക്കുമെന്നും പി.എം. ശ്രീ പദ്ധതിയുമായി ബന്ധപ്പെട്ട മന്ത്രിസഭാ ഉപസമിതിയുടെ യോഗം ബുധനാഴ്ച ചേരുമെന്നും അടൂർ പ്രകാശ് പറഞ്ഞു. പദ്ധതിയിൽ സംസ്ഥാനത്തിന് ആവശ്യമായ ഇളവുകൾ സംബന്ധിച്ച് അന്തിമ തീരുമാനം യോഗത്തിൽ കൈക്കൊള്ളുമെന്നും തുടർന്ന് ഇളവുകൾ ആവശ്യപ്പെട്ട് കേന്ദ്രസർക്കാരിനെ സമീപിക്കുമെന്നും അദ്ദേഹം കൂട്ടിച്ചേർത്തു.
അതേസമയം, വിഷയത്തിൽ സർക്കാരിനെ വിമർശിച്ച് മുൻ വിദ്യാഭ്യാസ മന്ത്രി വി. ശിവൻകുട്ടി രംഗത്തെത്തി. മുൻ സർക്കാർ പി.എം. ശ്രീ പദ്ധതിയുമായി മുന്നോട്ടുപോയിരുന്നില്ലെന്നും പദ്ധതി നടപ്പാക്കിയാൽ അക്കാദമിക കാര്യങ്ങളിൽ കേന്ദ്ര സർക്കാർ നിർദേശിക്കുന്ന വ്യവസ്ഥകൾ പാലിക്കേണ്ട സാഹചര്യമുണ്ടാകുമെന്നും അദ്ദേഹം ആരോപിച്ചു.
പി.എം. ശ്രീ പദ്ധതിയെ ചൊല്ലി സർക്കാരും പ്രതിപക്ഷവും തമ്മിലുള്ള രാഷ്ട്രീയ വാദപ്രതിവാദം കൂടുതൽ ശക്തമാകുന്ന സാഹചര്യത്തിലാണ് പുതിയ പ്രതികരണങ്ങൾ.
