മുഖ്യമന്ത്രി വി.ഡി.സതീശനോടുള്ള അതൃപ്തി പരസ്യമാക്കി യുഡിഎഫ് കൺവീനറും എംപിയുമായ അടൂർ പ്രകാശ്. യുഡിഎഫ് യോഗം അടുത്തകാലത്തായി ചേർന്നിട്ടില്ലെന്നും മുന്നണി യോഗം വിളിക്കാൻ മുഖ്യമന്ത്രി മുൻകൈ എടുക്കേണ്ടതുണ്ടെന്നും അടൂർ പ്രകാശ് പറഞ്ഞു. പല വിഷയങ്ങളിലും ചർച്ചയും കൂട്ടായ തീരുമാനവും ആവശ്യമാണ്. എന്നാൽ ഇക്കാര്യത്തിൽ വേണ്ടത്ര ആലോചന നടക്കുന്നില്ലെന്ന അതൃപ്തിയാണ് അദ്ദേഹം പ്രകടിപ്പിച്ചത്.
തദ്ദേശ ഉപതിരഞ്ഞെടുപ്പിൽ പ്രതീക്ഷിച്ച നേട്ടം ചിലയിടങ്ങളിൽ ഉണ്ടാക്കാനായില്ലെങ്കിലും വലിയ തിരിച്ചടിയില്ലാതെ 18 സീറ്റുകൾ യുഡിഎഫിന് നേടാനായെന്ന് അദ്ദേഹം പറഞ്ഞു. തദ്ദേശ ഉപതിരഞ്ഞെടുപ്പിൽ മുന്നണിക്കുള്ളിൽ ഏകോപനക്കുറവുണ്ടായെന്നും അദ്ദേഹം ചൂണ്ടിക്കാട്ടി. യുഡിഎഫ് സ്റ്റേറ്റ് കമ്മിറ്റി വിളിച്ചുചേർക്കേണ്ടത് കൺവീനറുടെ ചുമതലയാണ്. എന്നാൽ ചെയർമാൻ്റെ അനുമതിയോടെയാണ് യോഗം വിളിക്കേണ്ടതെന്നും അടൂർ പ്രകാശ് വ്യക്തമാക്കി.
മുന്നണിയിലെ വിവിധ വിഷയങ്ങളിൽ അഭിപ്രായവ്യത്യാസമുണ്ടാകുമ്പോൾ നേതൃത്വത്തെ അറിയിക്കുകയാണ് പതിവെന്നും അദ്ദേഹം പറഞ്ഞു. തൻ്റെ അതൃപ്തി അറിയിക്കേണ്ട സ്ഥലത്ത് അറിയിക്കും. ഇക്കാര്യത്തിൽ എഐസിസിക്ക് കത്ത് നൽകുമെന്നും അദ്ദേഹം വ്യക്തമാക്കി.
മുസ്‌ലിം ലീഗ് നേതാവ് എം.കെ.മുനീറിന് സംസ്ഥാന ഭരണപരിഷ്‌കാര കമ്മീഷൻ അധ്യക്ഷ പദവി നൽകിയതുമായി ബന്ധപ്പെട്ടും അടൂർ പ്രകാശ് പ്രതികരിച്ചു. മുനീറിന് ലഭിച്ച പദവി അർഹതപ്പെട്ടതാണെന്നും അർഹതയില്ലാത്ത ഒരാൾക്ക് പദവി നൽകിയെന്ന് താൻ പറയുന്നില്ലെന്നും അദ്ദേഹം വ്യക്തമാക്കി. തന്നെ അവഗണിക്കുന്നുണ്ടോ എന്നത് മാധ്യമങ്ങൾ വിലയിരുത്തട്ടെയെന്നും പറഞ്ഞു.
ക്യാബിനറ്റ് പദവി നൽകിയത് അർഹതയുള്ള വ്യക്തിക്കാണെങ്കിലും മുന്നണി കൺവീനർ എന്ന നിലയിൽ ഇക്കാര്യം സംബന്ധിച്ച് തന്നോട് യാതൊരു ചർച്ചയും നടത്തിയില്ലെന്നാണ് അടൂർ പ്രകാശിൻ്റെ പരാതി. പല കാര്യങ്ങളും ചർച്ചയോ ആലോചനയോ ഇല്ലാതെ നടക്കുന്നതിൽ ഖേദമുണ്ടെന്നും അദ്ദേഹം പറഞ്ഞു. യുഡിഎഫ് കൺവീനർ എന്ന നിലയിൽ വിവരങ്ങൾ ലഭിക്കാത്തതിലുള്ള അതൃപ്തി എഐസിസിയെ അറിയിക്കുമെന്നും അടൂർ പ്രകാശ് വ്യക്തമാക്കി.
