കൊല്ലം നെടുവത്തൂരിൽ കിണറ്റിൽ ചാടിയ യുവതിയെ രക്ഷിക്കാൻ ശ്രമിക്കുന്നതിനിടെ ഫയർഫോഴ്സ് അംഗം ഉൾപ്പെടെ മൂന്ന് പേർ മരിച്ചു. കൊല്ലം കൊട്ടാരക്കര ഫയർ ആൻഡ് റസ്ക്യൂ യൂണിറ്റ് അംഗമായ ആറ്റിങ്ങൽ സ്വദേശി സോണി എസ്. കുമാർ, കിണറ്റിൽ ചാടിയ നെടുവത്തൂർ സ്വദേശിനി അർച്ചന (33), സുഹൃത്ത് ശിവകൃഷ്ണൻ (22) എന്നിവർ മരിച്ചവരാണ്. സംഭവം ഇന്ന് പുലർച്ചെയോടെയാണ് നടന്നത്. രക്ഷാപ്രവർത്തനത്തിനിടെ കിണറ്റിൻ്റെ കൈവരി ഇടിഞ്ഞ് വീണതോടെയാണ് അപകടം ഉണ്ടായത്. മൂന്ന് കുട്ടികളുടെ അമ്മയാണ് മരിച്ച അർച്ചന.
ഏകദേശം 80 അടി ആഴമുള്ള കിണറിലാണ് സംഭവം നടന്നത്. പുലർച്ചെ 12.15 ഓടെയാണ് കൊട്ടാരക്കര ഫയർഫോഴ്സിന് അപകട വിവരം ലഭിച്ചത്. അർച്ചനയുടെ മൂത്ത രണ്ട് മക്കളാണ് അമ്മ കിണറ്റിൽ വീണതായി ഉദ്യോഗസ്ഥരെ അറിയിച്ചത്. കുട്ടികളെ അനുഗമിച്ച് ഫയർഫോഴ്സ് സംഘം സ്ഥലത്തെത്തി. തുടർന്ന് യൂണിറ്റ് അംഗമായ സോണി എസ്. കുമാർ റോപ് അടക്കം രക്ഷാസാധനങ്ങൾ ഉപയോഗിച്ച് കിണറിലേക്ക് ഇറങ്ങി. യുവതിയെ മുകളിലേക്ക് കയറ്റാൻ ശ്രമിക്കുമ്പോഴാണ് കൈവരി ഇടിഞ്ഞ് വീണ് ദുരന്തം സംഭവിച്ചത്.
അപകടസമയത്ത് കിണറിന് സമീപം നിൽക്കുകയായിരുന്ന അർച്ചനയുടെ സുഹൃത്ത് ശിവകൃഷ്ണനും കിണറ്റിലേക്ക് വീണു. നാട്ടുകാർ പറയുന്നതനുസരിച്ച്, അർച്ചനയും ശിവകൃഷ്ണനും കുറച്ച് നാളായി ഒരുമിച്ച് താമസിച്ചു വരികയായിരുന്നു. ഇവർ തമ്മിലുള്ള തർക്കമാണ് അർച്ചന കിണറ്റിലേക്ക് ചാടാൻ കാരണമായത് എന്നാണ് പ്രാഥമിക നിഗമനം. അപകടസമയത്ത് ശിവകൃഷ്ണൻ മദ്യലഹരിയിലായിരുന്നുവെന്നും വിവരം ലഭിച്ചിട്ടുണ്ട്.
