തേനി തേക്കിൻപട്ടി സബ് ജയിലിൽ 17 തടവുകാർ രക്ഷപ്പെട്ട സംഭവത്തിൽ സുരക്ഷാ വീഴ്ച വരുത്തിയ ഉദ്യോഗസ്ഥർക്കെതിരെ കടുത്ത നടപടിയുമായി തമിഴ്നാട് സർക്കാർ. ജയിൽ ചുമതലയുണ്ടായിരുന്ന ഡെപ്യൂട്ടി ജയിൽ സൂപ്രണ്ട് എൻ. നാഗേശ്വരനെ സർവീസിൽനിന്ന് സസ്പെൻഡ് ചെയ്തു. മുഖ്യമന്ത്രി സി. ജോസഫ് വിജയിയുടെ നിർദേശപ്രകാരമാണ് നടപടി.
ഒക്ടോബർ 26ന് രാത്രിയായിരുന്നു നാടകീയമായ ജയിൽ ചാട്ടം. അപസ്മാരം അഭിനയിച്ച് ജയിൽ ജീവനക്കാരുടെ ശ്രദ്ധ തിരിക്കുകയും തുടർന്ന് വാർഡന്മാരെ ആക്രമിച്ച് കീഴടക്കുകയും ചെയ്താണ് 17 റിമാൻഡ് തടവുകാർ രക്ഷപ്പെട്ടത്. എന്നാൽ ഡ്രോണുകൾ ഉൾപ്പെടെയുള്ള ആധുനിക സംവിധാനങ്ങൾ ഉപയോഗിച്ച് തമിഴ്നാട് പൊലീസ് നടത്തിയ തിരച്ചിലിൽ മണിക്കൂറുകൾക്കകം എല്ലാവരെയും പിടികൂടി വീണ്ടും ജയിലിലടച്ചു.
തടവുകാരുടെയും ഡ്യൂട്ടിയിലുണ്ടായിരുന്ന ജീവനക്കാരുടെയും സുരക്ഷ ഉറപ്പാക്കുന്നതിൽ ഗുരുതര വീഴ്ച വരുത്തിയതിനാണ് ഡെപ്യൂട്ടി ജയിൽ സൂപ്രണ്ടിനെതിരെ നടപടിയെടുത്തത്.
ജയിൽ ഭരണസംവിധാനത്തിലും അഴിച്ചുപണി നടത്തിയിട്ടുണ്ട്. മധുര സെൻട്രൽ ജയിൽ സൂപ്രണ്ടായിരുന്ന ആർ. കൃഷ്ണരാജിനെ സേലം സെൻട്രൽ ജയിലിലേക്ക് സ്ഥലംമാറ്റി. സംഭവത്തിന് പിന്നാലെ ജയിൽ ഡിജിപി സന്ദീപ് റായ് റാത്തോഡിനെ ടാൻജെഡ്കോയുടെ (TANGEDCO) ചീഫ് വിജിലൻസ് ഓഫീസറായി മാറ്റിയിരുന്നു. പകരം കെ. ശങ്കറിനെ ജയിൽ-തിരുത്തൽ സേവന വിഭാഗത്തിന്റെ പുതിയ എഡിജിപിയായി നിയമിച്ചു.
ജയിൽ സുരക്ഷയിലെ വീഴ്ചകൾ ഗൗരവമായി കാണുമെന്നും ഇത്തരം അശ്രദ്ധകൾ ആവർത്തിക്കുന്ന ഉദ്യോഗസ്ഥർക്കെതിരെ കർശന നടപടി സ്വീകരിക്കുമെന്നും മുഖ്യമന്ത്രി മുന്നറിയിപ്പ് നൽകി.
