അമൃത് ഭാരത് സ്റ്റേഷൻ പദ്ധതിയുടെ ഭാഗമായി നവീകരിച്ച കേരളത്തിലെ ആറ് റെയിൽവേ സ്റ്റേഷനുകൾ ജൂലൈ 17ന് പ്രധാനമന്ത്രി നരേന്ദ്ര മോദി രാജ്യത്തിന് സമർപ്പിക്കും. ആധുനിക സൗകര്യങ്ങളും പ്രാദേശിക സാംസ്കാരിക പൈതൃകവും സമന്വയിപ്പിച്ചാണ് സ്റ്റേഷനുകളുടെ നവീകരണം പൂർത്തിയാക്കിയത്.
തിരൂർ (₹26.55 കോടി), തലശ്ശേരി (₹22.32 കോടി), നിലമ്പൂർ റോഡ് (₹16.44 കോടി), പരപ്പനങ്ങാടി (₹14.21 കോടി), ചാലക്കുടി (₹9.94 കോടി) ഉൾപ്പെടെ കേരളത്തിലെ ആറ് സ്റ്റേഷനുകൾക്ക് പുതിയ മുഖച്ഛായയാണ് ലഭിച്ചിരിക്കുന്നത്. യാത്രക്കാർക്ക് കൂടുതൽ സൗകര്യപ്രദമായ രീതിയിൽ ലിഫ്റ്റുകൾ, എസ്‌കലേറ്ററുകൾ, വിശാലമായ കാത്തിരിപ്പ് കേന്ദ്രങ്ങൾ, ഡിജിറ്റൽ വിവര സംവിധാനങ്ങൾ, മെച്ചപ്പെട്ട ലൈറ്റിംഗ്, ആധുനിക ശുചിമുറികൾ, വികസിപ്പിച്ച പ്ലാറ്റ്‌ഫോമുകൾ എന്നിവ ഒരുക്കിയിട്ടുണ്ട്.
ഭിന്നശേഷിക്കാർക്ക് സൗഹൃദപരമായ റാംപുകൾ, ടാക്റ്റൈൽ പാതകൾ, പ്രത്യേക ശുചിമുറികൾ എന്നിവയും സ്റ്റേഷനുകളുടെ ഭാഗമായി സജ്ജീകരിച്ചിട്ടുണ്ട്. അതത് പ്രദേശങ്ങളുടെ പൈതൃകവും സംസ്കാരവും പ്രതിഫലിപ്പിക്കുന്ന വാസ്തുശൈലിയിലാണ് നവീകരണം നടത്തിയിരിക്കുന്നത്. സൗരോർജ ഉപയോഗം, ഹരിത ലാൻഡ്‌സ്‌കേപ്പിംഗ് തുടങ്ങിയ പരിസ്ഥിതി സൗഹൃദ സംവിധാനങ്ങൾക്കും പദ്ധതിയിൽ പ്രാധാന്യം നൽകിയിട്ടുണ്ട്.
രാജ്യത്തെ 1,300-ലധികം റെയിൽവേ സ്റ്റേഷനുകളെ ലോകോത്തര നിലവാരത്തിലേക്ക് ഉയർത്തുകയാണ് അമൃത് ഭാരത് സ്റ്റേഷൻ പദ്ധതിയുടെ ലക്ഷ്യം. കേരളത്തിൽ ട്രാക്ക് വികസനം, വൈദ്യുതീകരണം, സുരക്ഷാ സംവിധാനങ്ങൾ എന്നിവയ്‌ക്കൊപ്പം സ്റ്റേഷൻ നവീകരണത്തിലും വലിയ നിക്ഷേപമാണ് കേന്ദ്ര സർക്കാർ നടത്തിയിരിക്കുന്നത്. ഈ ആറ് സ്റ്റേഷനുകളുടെ സമർപ്പണം സംസ്ഥാനത്തിന്റെ റെയിൽവേ വികസനത്തിൽ സുപ്രധാന നാഴികക്കല്ലാകുമെന്നാണ് റെയിൽവേ അധികൃതരുടെ വിലയിരുത്തൽ.
