വനിതാ പ്രീമിയര്‍ ലീഗ് 2025 ടി20 ക്രിക്കറ്റ് കിരീടം
മുംബൈ ഇന്ത്യന്‍സിന്
വനിതാ പ്രീമിയര്‍ ലീഗ് 2025 ടി20 ക്രിക്കറ്റ് കിരീടം മുംബൈ ഇന്ത്യന്‍സിന്. കലാശപ്പോരാട്ടത്തില്‍ എട്ട് റണ്‍സിന് ഡല്‍ഹി ക്യാപിറ്റല്‍സിനെ കീഴടക്കി. 44 പന്തില്‍ 66 റണ്‍സെടുത്ത ക്യാപ്റ്റന്‍ ഹര്‍മന്‍ പ്രീത് കൗര്‍ ആണ് മുംബൈയുടെ വിജയശില്‍പി.
ആദ്യം ബാറ്റ് ചെയ്ത മുംബൈ ഇന്ത്യന്‍സ് 20 ഓവറില്‍ ഏഴ് വിക്കറ്റ് നഷ്ടത്തില്‍ 149 റണ്‍സെടുത്തു. ഡല്‍ഹി ക്യാപിറ്റല്‍സിൻ്റെ റണ്‍ ചേസിങ് 20 ഓവറില്‍ ഒമ്പത് വിക്കറ്റിന് 141 റണ്‍സില്‍ അവസാനിച്ചു.
150 റണ്‍സ് വിജയലക്ഷ്യം പിന്തുടര്‍ന്ന ഡല്‍ഹിക്ക് വേണ്ടി 26 പന്തില്‍ 40 റണ്‍സുമായി മാരിസാന്‍ കാപ്പ് പോരാടിയെങ്കിലും വിജയം എത്തിപ്പിടിക്കാനായില്ല. പ്രമുഖ താരം ജെമിമ റോഡ്രിഗസ് 21 പന്തില്‍ 30 റണ്‍സും നിക്കി പ്രസാദ് 23 പന്തില്‍ പുറത്താവാതെ 25 റണ്‍സും നേടി. എന്നാല്‍ മറ്റ് ബാറ്റര്‍മാര്‍ക്കൊന്നും പിടിച്ചുനില്‍ക്കാന്‍ കഴിയാതെ വന്നതോടെ ജയിക്കാമായിരുന്ന മല്‍സരം ഡല്‍ഹി കൈവിടുകയായിരുന്നു.
വനിതാ പ്രീമിയര്‍ ലീഗ് ചരിത്രത്തില്‍ രണ്ട് തവണ ജേതാക്കളാവുന്ന ആദ്യ ടീമാണ് മുംബൈ ഇന്ത്യന്‍സ്. 2023 ലെ ആദ്യ പതിപ്പിലും കിരീടം നേടിയിരുന്നു. തുടര്‍ച്ചയായി മൂന്ന് വര്‍ഷം ഫൈനല്‍ യോഗ്യത നേടിയിട്ടും ഡല്‍ഹി ക്യാപിറ്റല്‍സിന് ഒരു തവണ പോലും കിരീടം നേടാനായില്ല.
ആദ്യം ബൗള്‍ ചെയ്യാന്‍ തീരുമാനിച്ച ഡല്‍ഹി ക്യാപിറ്റല്‍സിന് സ്വപ്‌നതുല്യമായ തുടക്കമാണ് ലഭിച്ചത്. ഓപണര്‍മാരായ ഹെയ്ലി മാത്യൂസിനെയും യാസ്തിക ഭാട്ടിയയെയും പുറത്താക്കി മാരിസാന്‍ കാപ്പ് ഗംഭീര തുടക്കം കുറിച്ചു. എന്നാല്‍ ഹര്‍മന്‍പ്രീത് കൗറിൻ്റെ അര്‍ദ്ധസെഞ്ചുറിയാണ് മുംബൈയെ മാന്യമായ ഇന്നിങ്‌സ് സ്‌കോറിലേക്ക് നയിച്ചത്. നാറ്റ് സിവര്‍-ബ്രണ്ടിനൊപ്പം 89 റണ്‍സിൻ്റെ നിര്‍ണായക കൂട്ടുകെട്ടും അവര്‍ സ്ഥാപിച്ചു.
മറുപടി ബാറ്റിങിനിറങ്ങിയ ഡിസിക്ക് പവര്‍പ്ലേയില്‍ തന്നെ മെഗ് ലാനിങ്, ഷഫാലി വര്‍മ, ജെസ് ജോനാസെന്‍ എന്നിവരുടെ വിക്കറ്റുകള്‍ നഷ്ടമായി. 30 റണ്‍സ് നേടിയ ജെമീമ റോഡ്രിഗസ് മാത്രമാണ് മുന്‍നിര ബാറ്റര്‍മാരില്‍ പിടിച്ചുനിന്നത്. തുടര്‍ച്ചയായി വിക്കറ്റുകള്‍ നഷ്ടമായ ശേഷം ഏഴാം വിക്കറ്റില്‍ മാരിസാന്‍ കാപ്പും നിക്കി പ്രസാദും നല്ല കൂട്ടുകെട്ടുണ്ടാക്കി. റണ്‍റേറ്റ് ഉയര്‍ത്താനുള്ള ശ്രമത്തില്‍ മാരിസന്‍ കാപ്പ് 40 റണ്‍സുമായി പുറത്തായി. അവസാന ഓവറുകളില്‍ നിക്കി പ്രസാദ് കഠിനമായി ശ്രമിച്ചെങ്കിലും ഡിസിക്ക് എട്ട് റണ്‍സ് അകലെ വച്ച് ഇന്നിങ്‌സ് അവസാനിപ്പിക്കേണ്ടി വന്നു. വിജയികള്‍ക്കായി നാറ്റ് സിവര്‍-ബ്രണ്ട് നാല് ഓവറില്‍ 30 റണ്‍സിന് മൂന്ന് വിക്കറ്റ് വീഴ്ത്തി.
