ജെയ്നമ്മ തിരോധന കേസിൽ പൊലീസ് അറസ്റ്റിലായ സെബാസ്റ്റ്യൻ ഇത്രയും ദിവസം അന്വേഷണ ഉദ്യോഗസ്ഥരെ വട്ടം ചുറ്റിക്കുകയായിരുന്നു. ചോദ്യം ചെയ്യുമ്പോഴെല്ലം മൗനം പാലിച്ച സെബാസ്റ്റ്യൻ എന്നാലിപ്പോൾ ഉദ്യോഗസ്ഥരുമായി സഹകരിക്കുന്നുണ്ട്.
ക്രൈംബ്രാഞ്ച് അന്വേഷണ സംഘം സെബാസ്റ്റ്യന്‍റെ ഭാര്യയുടെ വെട്ടിമുകളിലെ വീട്ടുമുറ്റത്ത് പാർക്ക് ചെയ്തിരുന്ന കാറിൽനിന്ന് കത്തി, ചുറ്റിക, ഡീസലിന്‍റെ ഗന്ധമുള്ള കന്നാസ്, പഴ്സ് എന്നിവ കണ്ടെടുത്തിരുന്നു.
സെബാസ്റ്റ്യൻ 20 ലിറ്ററിന്‍റെ കന്നാസിൽ ഡീസൽ വാങ്ങിയതായി സ്ഥിരീകരിച്ചിട്ടുണ്ട്. കോട്ടയം ക്രൈംബ്രാഞ്ചിന്‍റെ മിന്നൽ പരിശോധന വ്യാഴാഴ്ച രാത്രി 11 ഓടെയായിരുന്നു. കേസിൽ നിർണായകമാകാവുന്ന തെളിവുകൾ ഈ പരിശോധനയിലൂടെ ലഭിച്ചതായാണ് സൂചന. ചോദ്യം ചെയ്യലിന്‍റെ ആദ്യ ഘട്ടത്തിൽ സെബാസ്റ്റ്യൻ അന്വേഷണം വഴിതെറ്റിക്കുന്ന രീതിയിൽ പരസ്പര വിരുദ്ധമായ മൊഴി നൽകിയും തെറ്റായ വിവരങ്ങൾ നൽകിയും അന്വേഷണ സംഘത്തെ വലയ്ക്കുകയായിരുന്നു.
