ബെംഗളൂരുവിൽ അടുത്ത ദിവസങ്ങളിലും മഴ തുടരുമെന്ന് കാലാവസ്ഥാ നിരീക്ഷണ കേന്ദ്രത്തിൻ്റെ പ്രവചനം. ഓഗസ്റ്റ് 20 മുതൽ ഏഴ് ദിവസത്തേക്ക് നഗരത്തിൽ പൊതുവെ മേഘാവൃതമായ അന്തരീക്ഷവും ഇടയ്ക്കിടെ നേരിയ മഴയും പ്രതീക്ഷിക്കുന്നതായി റിപ്പോർട്ട്.
അടുത്ത ദിവസങ്ങളിൽ പകൽ താപനില 29 മുതൽ 30 ഡിഗ്രി സെൽഷ്യസ് വരെയായിരിക്കും. രാത്രിയിലെ കുറഞ്ഞ താപനില 21 മുതൽ 22 ഡിഗ്രി സെൽഷ്യസ് വരെയാകുമെന്നാണ് പ്രവചനം. അതിനാൽ വലിയ ചൂടിന് സാധ്യത കുറവായിരിക്കുമെന്നും കാലാവസ്ഥാ വിദഗ്ധർ വിലയിരുത്തുന്നു.
ഓഗസ്റ്റ് 21 മുതൽ 26 വരെയുള്ള ദിവസങ്ങളിലും നഗരത്തിൻ്റെ വിവിധ ഭാഗങ്ങളിൽ ഇടവിട്ട് മഴ ലഭിക്കാനാണ് സാധ്യത. ചില സമയങ്ങളിൽ മഴ ശക്തമാകാമെങ്കിലും പൊതുവെ നേരിയ മഴയ്ക്കാണ് സാധ്യതയെന്നാണ് നിലവിലെ പ്രവചനം. മഴ തുടരുന്നതിനാൽ താഴ്ന്ന പ്രദേശങ്ങളിൽ വെള്ളക്കെട്ടിനും റോഡുകളിൽ ഗതാഗതക്കുരുക്കിനും സാധ്യതയുണ്ട്. ഇരുചക്രവാഹന യാത്രക്കാരും രാവിലെ-വൈകിട്ട് യാത്ര ചെയ്യുന്നവരും ജാഗ്രത പാലിക്കുന്നത് ഉചിതമാണ്. അതേസമയം, ഓഗസ്റ്റ് മാസത്തിൽ ബെംഗളൂരുവിലും ദക്ഷിണ ഉൾനാടൻ കർണാടകയിലും മഴയുടെ അളവ് സാധാരണയേക്കാൾ കുറയാനുള്ള സാധ്യതയുണ്ടെന്ന മുൻകാല IMD വിലയിരുത്തലും പുറത്തുവന്നിരുന്നു.
