സംസ്ഥാനത്ത് കടുത്ത വൈദ്യുതി നിയന്ത്രണം തുടരുന്നതിനിടെ പ്രതിസന്ധി ചർച്ച ചെയ്യാൻ ഇന്ന് ഉന്നതതല യോഗം ചേരും. വൈദ്യുതി മന്ത്രി കെ. കൃഷ്ണൻകുട്ടിയുടെ ചേംബറിൽ രാവിലെ 11ന് ചേരുന്ന യോഗത്തിൽ KSEB ചെയർമാനും ബോർഡ് അംഗങ്ങളും പങ്കെടുക്കും.
സംസ്ഥാനത്ത് ചൂട് ശക്തമായതോടെ വൈദ്യുതി ആവശ്യകത കുത്തനെ ഉയർന്നതാണ് നിലവിലെ പ്രതിസന്ധിക്ക് പ്രധാന കാരണം. വർധിച്ച ആവശ്യകത നേരിടാൻ ആവശ്യമായ മുന്നൊരുക്കങ്ങൾ നടത്തുന്നതിൽ സർക്കാരിനും KSEBക്കും വീഴ്ച സംഭവിച്ചെന്ന വിമർശനം ശക്തമായ സാഹചര്യത്തിലാണ് നിർണായക യോഗം.
കഴിഞ്ഞ ദിവസം സംസ്ഥാനത്തെ ചില പ്രദേശങ്ങളിൽ മൂന്ന് തവണ വരെ വൈദ്യുതി നിയന്ത്രണം ഏർപ്പെടുത്തിയിരുന്നു. വൈദ്യുതി ഉപഭോഗം പെട്ടെന്ന് ഉയർന്നതും ദേശീയ ഗ്രിഡിലെ ഫ്രീക്വൻസി കുറഞ്ഞതുമാണ് നിയന്ത്രണത്തിന് കാരണമായത്.
മഴ ലഭിക്കാത്തതിനാൽ സംസ്ഥാനത്ത് ചൂട് വർധിക്കുകയും ഇതോടെ വൈദ്യുതി ഉപഭോഗം ഉയരുകയും ചെയ്തു. പ്രതീക്ഷിച്ചതിലും ഉയർന്ന വൈദ്യുതി ആവശ്യകതയാണ് നിലവിൽ രേഖപ്പെടുത്തുന്നത്.
അതേസമയം, മഴയെ തുടർന്നുണ്ടായ കൽക്കരി ക്ഷാമം ഉത്തരേന്ത്യയിലെ വൈദ്യുതി ഉൽപ്പാദനത്തെയും ബാധിച്ചിട്ടുണ്ട്. പീക്ക് സമയത്തെ അധിക വൈദ്യുതി ആവശ്യകത നിറവേറ്റുന്നതിനായി KSEB ഉറപ്പാക്കിയിരുന്ന ഹ്രസ്വകാല വൈദ്യുതി കരാറുകളുടെ അഭാവവും പ്രതിസന്ധി രൂക്ഷമാക്കിയതായി വിലയിരുത്തുന്നു.
കൽക്കരി ക്ഷാമത്തെ തുടർന്ന് കേന്ദ്ര വിഹിതത്തിൽ കുറവുണ്ടായതും തിരിച്ചടിയായി. ദക്ഷിണേന്ത്യയിലെ മറ്റ് സംസ്ഥാനങ്ങളിലും വൈദ്യുതി ആവശ്യകത ഉയർന്നതോടെ പവർ എക്സ്ചേഞ്ചിൽ നിന്ന് ആവശ്യമായ അളവിൽ വൈദ്യുതി ലഭ്യമാക്കുന്നതിനും ബുദ്ധിമുട്ട് നേരിടുന്നുണ്ട്.
വൈദ്യുതി ലഭ്യത ഉറപ്പാക്കുന്നതിനുള്ള അടിയന്തര നടപടികൾ, നിലവിലെ നിയന്ത്രണം, അധിക വൈദ്യുതി വാങ്ങൽ തുടങ്ങിയ വിഷയങ്ങൾ യോഗത്തിൽ ചർച്ച ചെയ്യുമെന്നാണ് വിവരം.
