അന്താരാഷ്ട്ര സമുദ്ര മേഖലയിൽ പട്രോളിംഗ് നടത്തുകയായിരുന്ന ഇന്ത്യൻ നാവികസേനാ കപ്പലിൽ പാകിസ്ഥാൻ നാവികസേനയുടെ കപ്പൽ ഇടിച്ചു. ഒമാൻ തീരത്തിൻ്റെ കിഴക്കൻ മേഖലയിൽ നിന്ന് ഏകദേശം 200 കിലോമീറ്റർ അകലെയാണ് സംഭവം നടന്നതെന്നാണ് വിവരം. കൂട്ടിയിടിയിൽ ഇന്ത്യൻ കപ്പലിന് കാര്യമായ കേടുപാടുകൾ സംഭവിച്ചിട്ടില്ലെന്നാണ് പ്രാഥമിക വിവരം.
നാവികസേനാ കപ്പലുകളുടെ സൈനിക നീക്കങ്ങളെക്കുറിച്ച് മുൻകൂട്ടി പരസ്പരം അറിയിക്കണമെന്ന ഇന്ത്യ–പാകിസ്ഥാൻ ധാരണ പാകിസ്ഥാൻ ലംഘിച്ചെന്ന് ഇന്ത്യ വ്യക്തമാക്കി. സംഭവത്തിൽ പാകിസ്ഥാൻ നാവിക യൂണിറ്റിൻ്റെ അംഗീകരിക്കാനാകാത്തതും പ്രൊഫഷണൽ അല്ലാത്തതുമായ പെരുമാറ്റത്തിൽ ഇന്ത്യ ശക്തമായ പ്രതിഷേധം രേഖപ്പെടുത്തി.
ഇതുമായി ബന്ധപ്പെട്ട് ന്യൂഡൽഹിയിലെ പാകിസ്ഥാൻ നയതന്ത്ര പ്രതിനിധിയെ വിളിച്ചുവരുത്തി ഇന്ത്യ അതൃപ്തി അറിയിച്ചു. 1991 ഏപ്രിലിൽ ഇന്ത്യയും പാകിസ്ഥാനും ഒപ്പുവെച്ച കരാറിലെ ആർട്ടിക്കിൾ 10 പ്രകാരം സൈനിക പരിശീലനങ്ങൾ, കുസൃതികൾ, സൈനിക നീക്കങ്ങൾ എന്നിവ സംബന്ധിച്ച് മുൻകൂട്ടി വിവരം കൈമാറേണ്ടതുണ്ട്. പാക് നാവികസേനാ കപ്പലിൻ്റെ നടപടി ഈ വ്യവസ്ഥയുടെ നേരിട്ടുള്ള ലംഘനമാണെന്ന് ഇന്ത്യ ചൂണ്ടിക്കാട്ടി.
ഭാവിയിൽ ഇത്തരം സംഭവങ്ങൾ ആവർത്തിക്കാതിരിക്കാൻ പാകിസ്ഥാൻ സൈനിക യൂണിറ്റുകൾ തക്കതായ ജാഗ്രത പാലിക്കണമെന്നും ഇരു രാജ്യങ്ങളും തമ്മിലുള്ള പ്രസക്തമായ കരാറുകളിലെ വ്യവസ്ഥകൾ മാനിക്കണമെന്നും പാക് പ്രതിനിധിയോട് ഇന്ത്യ ആവശ്യപ്പെട്ടു.
ഇസ്ലാമാബാദിലെ ഇന്ത്യൻ പ്രതിനിധിയോടും പാകിസ്ഥാൻ വിദേശകാര്യ മന്ത്രാലയത്തിന് മുന്നിൽ സമാനമായ പ്രതിഷേധം രേഖപ്പെടുത്താൻ നിർദേശം നൽകിയിട്ടുണ്ട്. കൂട്ടിയിടിയിൽ വലിയ നാശനഷ്ടങ്ങളൊന്നും ഉണ്ടായിട്ടില്ലെങ്കിലും, അന്താരാഷ്ട്ര സമുദ്ര മേഖലയിൽ നടന്ന സംഭവം ഇരു രാജ്യങ്ങൾക്കുമിടയിലെ നയതന്ത്ര തലത്തിൽ ശ്രദ്ധേയമായിരിക്കുകയാണ്.
