നെടുമ്പാശേരി മിനി കൂപ്പർ അപകടക്കേസിൽ സുഹൈൽ സജീവ് ഉൾപ്പെടെ നാലു പ്രതികൾ സമർപ്പിച്ച ജാമ്യാപേക്ഷ കോടതി തള്ളി. എറണാകുളം ജില്ലാ അഡീഷണൽ സെഷൻസ് കോടതിയുടേതാണ് നടപടി. പ്രോസിക്യൂഷൻ ഉന്നയിച്ച വാദങ്ങൾ അംഗീകരിച്ച കോടതി, പ്രതികൾ ബോസ്റ്റൽ സ്കൂളിൽ തുടരുമെന്നും വ്യക്തമാക്കി.
റിമാൻഡിൽ 14 ദിവസം പിന്നിട്ട സാഹചര്യത്തിലാണ് പ്രതികൾ ജാമ്യാപേക്ഷ നൽകിയത്. അമിതവേഗത്തിൽ വാഹനം ഓടിക്കുന്നത് പ്രതിയുടെ പതിവാണെന്നും അപകടസമയത്ത് കാർ മണിക്കൂറിൽ 163 കിലോമീറ്റർ വേഗത്തിലായിരുന്നുവെന്നതിന് തെളിവുകൾ ലഭിച്ചിട്ടുണ്ടെന്നും പ്രോസിക്യൂഷൻ കോടതിയെ അറിയിച്ചു. പ്രതികൾക്ക് ജാമ്യം അനുവദിക്കുന്നത് സമൂഹത്തിന് തെറ്റായ സന്ദേശം നൽകുമെന്നും പ്രോസിക്യൂഷൻ വാദിച്ചു.
കേസിലെ മൂന്നാം പ്രതിയായ ജോയൽ സുഹൃത്തിന് അയച്ച ശബ്ദസന്ദേശവും പ്രോസിക്യൂഷൻ കോടതിയിൽ സമർപ്പിച്ചു. അപകടം നടന്ന ദിവസം രാവിലെ 9.25ന് അയച്ച സന്ദേശത്തിൽ മദ്യപിച്ചശേഷം അമിതവേഗത്തിൽ വാഹനമോടിച്ചതിനെക്കുറിച്ച് ജോയൽ പറയുന്നതായാണ് റിപ്പോർട്ട്. അപകടത്തിൽ മൂന്നുപേർ മരിച്ചെന്നും വാഹനത്തിലുണ്ടായിരുന്നവർ സംഭവസ്ഥലത്തുനിന്ന് പോകാൻ തീരുമാനിച്ചതായും സന്ദേശത്തിൽ പരാമർശമുണ്ട്. ഇത് കേസിലെ മുഖ്യപ്രതിയായ 19കാരൻ സുഹൈൽ സജീവിന് തിരിച്ചടിയായെന്നാണ് വിലയിരുത്തൽ.
സുഹൈൽ സജീവ്, നിനവ്, അമീൻ എന്നിവരാണ് കേസിലെ പ്രധാന പ്രതികൾ. ഒക്ടോബർ 11ന് പുലർച്ചെ നെടുമ്പാശേരി അത്താണി സിഗ്നലിന് സമീപമായിരുന്നു അപകടം. മിനി കൂപ്പർ കാറും ഇരുചക്രവാഹനവും കൂട്ടിയിടിച്ച് സ്കൂട്ടർ യാത്രക്കാരായ മൂന്നു യുവാക്കൾ മരിക്കുകയായിരുന്നു.
വയനാട് മടക്കിമല സ്വദേശി ദേവിക (21), മംഗളൂരു സുള്ള്യ സ്വദേശി ഇയാസ് (21), പാലക്കാട് കരിമ്പ സ്വദേശി ഗോപിക (21) എന്നിവരാണ് മരിച്ചത്. അപകടത്തിന്റെ ഗൗരവവും പ്രതികൾക്കെതിരായ തെളിവുകളും പരിഗണിച്ചാണ് ജാമ്യാപേക്ഷ തള്ളിയത്.
