യു. പ്രതിഭയ്ക്കെതിരായ സ്ത്രീവിരുദ്ധ പ്രസ്താവന നടത്തിയ ഇർഷാദിനെ സസ്പെൻഡ് ചെയ്ത് മുസ്ലിം ലീഗ്. കായംകുളം മണ്ഡലത്തിലെ എൽഡിഎഫ് സ്ഥാനാർഥി യു. പ്രതിഭയ്ക്കെതിരെ സ്ത്രീവിരുദ്ധ പ്രസ്താവന നടത്തിയ ഇർഷാദ് ചക്കാലശേരിയെ പാർട്ടിയുടെ പ്രാഥമിക അംഗത്വത്തിൽ നിന്ന് മുസ്ലിം ലീഗ് അന്വേഷണ വിധേയമായി സസ്പെൻഡ് ചെയ്യുക മാത്രമല്ല കായംകുളം നിയോജക മണ്ഡലം ചെയർമാൻ സ്ഥാനത്തു നിന്ന് നീക്കുകയും ചെയ്തു.
പകരം കായകുളം യുഡിഎഫ് ചെയർമാനായി മുസ്ലിം ലീഗ് ജില്ലാ ജനറൽ സെക്രട്ടറി എച്ച്‌. ബഷീർ കുട്ടിയെ നിയമിക്കുകയും ചെയ്തു. ഇർഷാദിനെ പാർട്ടിയുടെ പ്രാഥമിക അംഗത്വത്തിൽ നിന്ന് സസ്പെൻഡ് ചെയ്തതായി മുസ്ലിംലീഗ് സംസ്ഥാന കമ്മിറ്റി ഓഫീസാണ് അറിയിച്ചത്. വ്യക്തിപരമായ വിമർശനങ്ങൾ നടത്താനുള്ളതല്ല തെരഞ്ഞെടുപ്പ് പ്രസംഗമെന്ന് ചൂണ്ടിക്കാട്ടി ലിജു ഇർഷാദ് ചക്കാലശേരിയുടെ പരാമർശത്തെ തള്ളി.
യുഡിഎഫ് നേതാവിന്‍റെ പരാമർശത്തെ ന്യായീകരിക്കില്ലെന്നും ഒരിക്കലും അംഗീകരിക്കാനാകില്ലെന്നും ശക്തമായി അപലപിക്കുന്നുവെന്നും പറഞ്ഞ ലിജു ഖേദവും പ്രകടിപ്പിക്കുകയുമുണ്ടായി. അതേസമയം യു. പ്രതിഭയ്ക്കെതിരായ അധിക്ഷേപ പരാമര്‍ശം വിവാദമായതിന് പിന്നാലെ ഇർഷാദ് ചക്കാലശേരിയും ഖേദം പ്രകടിപ്പിച്ചിരുന്നു.
