മഹാഭാരതത്തിലെ ഭീമൻ്റെ ഇതുവരെ ആരും എത്തിനോക്കാത്ത ചില മുഹൂർത്തങ്ങൾ പുനർവായിക്കുന്ന വ്യത്യസ്തമായ ഭരതനാട്യം നൃത്തനിർമ്മിതിയായ ‘ഇര (IRA) – ദി ഐറണി ഓഫ് ഗ്ലോറി’ ഓഗസ്റ്റ് 8-ന് ബെംഗളൂരുവിൽ അരങ്ങേറും. അംഗ ആർട്ട് സ്പേസ് അവതരിപ്പിക്കുന്ന ഈ നൃത്താവിഷ്കാരം രവീന്ദ്ര കലാക്ഷേത്രയിലാണ് നടക്കുന്നത്.
വീരതയുടെയും വിജയത്തിൻ്റെയും കഥകൾക്കപ്പുറം ഭീമൻ്റെ മനസ്സിലെ വികാരങ്ങളും സംഘർഷങ്ങളും ത്യാഗങ്ങളും പ്രേക്ഷകരിലേക്ക് എത്തിക്കുന്നതാണ് അവതരണത്തിൻ്റെ പ്രത്യേകത. ശക്തിയുടെ പ്രതീകമായി അറിയപ്പെടുന്ന ഭീമൻ്റെ ശബ്ദവും മനുഷ്യസഹജമായ വികാരങ്ങളുമാണ് നൃത്തനാടകത്തിൻ്റെ പ്രമേയം.
ഭരതനാട്യത്തിൻ്റെ ശാസ്ത്രീയ സൗന്ദര്യവും സാഹിത്യത്തിൻ്റെ ആഴവും സമന്വയിപ്പിച്ചുകൊണ്ട് സംഗീതം, താളം, അഭിനയപ്രകടനം, നൃത്തസംവിധാനം എന്നിവയിലൂടെ മഹാഭാരതത്തിലെ ഇതുവരെ അധികം പറയപ്പെടാത്ത നിമിഷങ്ങളെയാണ് ‘ഇര‘അവതരിപ്പിക്കുന്നത്. മഹാഭാരതത്തിൻ്റെ കഥ ആവർത്തിക്കുന്നതല്ല, മറിച്ച് കഥാപാത്രങ്ങളുടെ ഉള്ളിലെ മനുഷ്യനെ കണ്ടെത്താനുള്ള ശ്രമമാണിത്.
റോഹിത് രഘു, മേഘന മനോജ്, ജഗദീശ്വർ സുകുമാർ എന്നിവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ഉഡുപ്പി ശ്രീനാഥ്, മൻഹുഷ്രീ ബാലകൃഷ്ണൻ എന്നിവർ ഗാനാലാപനവും, റോഹിത് രഘു, ജഗദീശ്വർ സുകുമാർ എന്നിവർ സംഗീതസംവിധാനവും വരികളും നിർവഹിക്കുന്നു.
ഓഗസ്റ്റ് 8 ശനിയാഴ്ച വൈകിട്ട് 7 മണിക്കാണ് പരിപാടി.
സാഹിത്യം, ശാസ്ത്രീയ നൃത്തം, സംഗീതം, നാടകാവിഷ്കാരം എന്നിവയെ സമന്വയിപ്പിക്കുന്ന ഈ അവതരണം, മഹാഭാരതത്തെ പുതിയ കാഴ്ചപ്പാടിൽ അനുഭവിക്കാൻ കലാസ്വാദകർക്കുള്ള അപൂർവ അവസരമാകും.
ടിക്കറ്റുകൾക്ക് വിളിക്കുക 7025077643
