ബംഗാള് ഉള്ക്കടലില് വീണ്ടും പുതിയ ഒരു ന്യൂനമര്ദ്ദം രൂപപ്പെടാന് സാധ്യത. ഇതുകാരണം ഓണം ദിവസങ്ങളില് മഴ പെയ്തേക്കുമെന്ന് കാലാവസ്ഥ വകുപ്പ് പ്രവചിക്കുന്നു. ബംഗാള് ഉള്ക്കടലില് വീണ്ടും പുതിയ ഒരു ന്യൂനമര്ദ്ദം രൂപപ്പെടുന്നതോടെ ബുധനാഴ്ച മുതല് സംസ്ഥാനത്ത് മഴ ശക്തമാകുമെന്നാണ് കാലാവസ്ഥ വകുപ്പിന്റെ പ്രവചനം. ദിവസങ്ങള്ക്ക് മുന്പ് ബംഗാള് ഉള്ക്കടലില് രൂപപ്പെട്ട ന്യൂനമര്ദ്ദം ദുര്ബലമായതിനെ തുടര്ന്നാണ് സംസ്ഥാനത്ത് മഴ കുറഞ്ഞത്. ന്യൂനമര്ദ്ദത്തെ തുടര്ന്ന് കഴിഞ്ഞ ദിവസങ്ങളില് സംസ്ഥാനത്ത് ശക്തമായ മഴയാണ് ലഭിച്ചത്.
ബുധനാഴ്ചയും വ്യാഴാഴ്ചയും ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് നിലനില്ക്കുന്നത്. ജാഗ്രതയുടെ ഭാഗമായി ബുധനാഴ്ച തൃശൂര്, മലപ്പുറം, കോഴിക്കോട്, കണ്ണൂര്, കാസർഗോഡ് ജില്ലകളിലും വ്യാഴാഴ്ച തൃശൂര്, കണ്ണൂര്, കാസര്ഗോഡ് ജില്ലകളിലും കാലാവസ്ഥ വകുപ്പ് യെല്ലോ അലര്ട്ട് പ്രഖ്യാപിച്ചു.
