ബംഗാൾ ഉൾക്കടലിൻ്റെ വടക്ക്, ഒഡീഷ തീരത്തിനടുത്ത് രൂപം കൊണ്ട ന്യൂനമർദ്ദം കാരണം സെപ്റ്റംബർ 1 വരെ കർണാടകയിൽ വ്യാപകമായി മഴ പെയ്യുമെന്ന് ഇന്ത്യൻ കാലാവസ്ഥാ വകുപ്പ്. സമുദ്രനിരപ്പിൽ നിന്ന് 7.6 കിലോമീറ്റർ വരെ ഉയരത്തിൽ വ്യാപിച്ചുകിടക്കുന്ന ന്യൂനമർദ്ദവും അനുബന്ധ ന്യൂനമർദവും സംസ്ഥാനത്തിൻ്റെ പല ഭാഗങ്ങളിലും കനത്ത മഴയ്ക്ക് കാരണമാകും.
ഇന്ന് മുതൽ സെപ്റ്റംബർ 1 വരെ തീരദേശ കർണാടകയിൽ വ്യാപകമായ മഴ ലഭിക്കുമെന്ന് ഐഎംഡി അറിയിച്ചു. ഇന്ന് ഉത്തര കന്നഡ, ഉഡുപ്പി, ദക്ഷിണ കന്നഡ ജില്ലകളിൽ ഓറഞ്ച് അലേർട്ടും തുടർന്ന് ഓഗസ്റ്റ് 30 വരെ യെല്ലോ അലേർട്ടും പ്രഖ്യാപിച്ചിട്ടുണ്ട്. വടക്കൻ, തെക്കൻ ഉൾനാടൻ ജില്ലകളിൽ ഓഗസ്റ്റ് 29 വരെ മഴ ലഭിക്കാൻ സാധ്യതയുണ്ട്.
ബീദർ, കലബുറഗി, ചിക്കമംഗളൂരു, ശിവമോഗ, ഹാസൻ, കുടക് ജില്ലകളിൽ കനത്ത മഴയ്ക്ക് സാധ്യതയുണ്ടെന്ന് പ്രവചിക്കപ്പെട്ടിട്ടുണ്ട്. ഓഗസ്റ്റ് 27, 28 തീയതികളിൽ ഈ ജില്ലകളിൽ യെല്ലോ അലേർട്ട് പ്രഖ്യാപിച്ചിട്ടുണ്ട്.
