വയനാട് കൽപറ്റയ്ക്കടുത്ത് കള്ളാടിയിൽ തുരങ്കപാത നിർമാണ പ്രദേശത്തിന് സമീപമുണ്ടായ വൻ മണ്ണിടിച്ചിലിൽ മരിച്ചവരുടെ എണ്ണം അഞ്ചായി. അപകടത്തിൽ തുരങ്കപാത പദ്ധതിക്കായി നിർമിച്ച കോൺക്രീറ്റ് സംരക്ഷണഭിത്തിയും തകർന്നു. മണ്ണിനടിയിൽ കുടുങ്ങിയ ഒൻപത് പേരെ രക്ഷപ്പെടുത്തി ആശുപത്രിയിലേക്ക് മാറ്റിയിട്ടുണ്ട്. ഏഴ് പേരെ ഇനിയും കണ്ടെത്താനായിട്ടില്ല. ഇവർ മണ്ണിനടിയിൽ കുടുങ്ങിക്കിടക്കുന്നതായാണ് സംശയം. പ്രദേശത്ത് രക്ഷാപ്രവർത്തനം ഊർജിതമായി തുടരുകയാണ്.
രക്ഷാദൗത്യത്തിനിടെ മേപ്പാടി എസ്.ഐയ്ക്ക് പരിക്കേറ്റതിനെ തുടർന്ന് ആശുപത്രിയിൽ പ്രവേശിപ്പിച്ചു. അഗ്നിരക്ഷാസേന, പൊലീസ്, ദുരന്തനിവാരണ സേന എന്നിവയുടെ നേതൃത്വത്തിലാണ് തിരച്ചിൽ തുടരുന്നത്.
മീനാക്ഷി പാലത്തിന് സമീപം തുരങ്കപാതയുടെ നിർമാണം പുരോഗമിക്കുന്ന മേഖലയിലാണ് അപകടമുണ്ടായത്. കനത്ത മഴയെ തുടർന്ന് നിർമാണ പ്രവർത്തനങ്ങൾ ഇന്നലെ തന്നെ നിർത്തിവച്ചിരുന്നെങ്കിലും പ്രദേശത്തുണ്ടായിരുന്ന തൊഴിലാളികളും വാഹനങ്ങളും മണ്ണിനടിയിൽപ്പെടുകയായിരുന്നു.
വയനാട്ടിൽ ഇന്നലെയോടെ ആരംഭിച്ച അതിതീവ്ര മഴ തുടരുകയാണ്. കോഴിക്കോട്, വയനാട് ജില്ലകളിൽ ഇന്ന് റെഡ് അലർട്ട് പ്രഖ്യാപിച്ചിട്ടുണ്ട്. മഴയുടെ പശ്ചാത്തലത്തിൽ വയനാട്ടിലെ വിദ്യാഭ്യാസ സ്ഥാപനങ്ങൾക്ക് നാളെ അവധി പ്രഖ്യാപിച്ചു. തിങ്കളാഴ്ചയും ചൊവ്വാഴ്ച പുലർച്ചെയും മേഖലയിൽ കനത്ത മഴ ലഭിച്ചിരുന്നു. നിർമാണ മേഖലയിൽ അതീവ ജാഗ്രത നിർദേശം നിലനിന്നിരുന്ന സാഹചര്യത്തിലാണ് വൻ മണ്ണിടിച്ചിൽ ഉണ്ടായത്.
വയനാട് കള്ളാടിയിൽ ഉണ്ടായ മണ്ണിടിച്ചിൽ ദുരന്തത്തിൽ രക്ഷാപ്രവർത്തനങ്ങൾ വിവിധ സേനകളുടെ നേതൃത്വത്തിൽ ഊർജിതമായി തുടരുകയാണെന്ന് മുഖ്യമന്ത്രി അറിയിച്ചു. സംസ്ഥാന ദുരന്ത നിവാരണ അതോറിറ്റിയിലെത്തി സ്ഥിതിഗതികൾ വിലയിരുത്തിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
മീനങ്ങാടിയിൽ നിന്നുള്ള എൻഡിആർഎഫ് സംഘം സംഭവസ്ഥലത്ത് എത്തിയതായും കോഴിക്കോട് നിന്നുള്ള കൂടുതൽ അംഗങ്ങൾ ഉടൻ എത്തുമെന്നും മുഖ്യമന്ത്രി വ്യക്തമാക്കി. നിലവിൽ സംസ്ഥാന പോലീസും ഫയർഫോഴ്സും രക്ഷാപ്രവർത്തനങ്ങളിൽ സജീവമാണ്. തൃശ്ശൂരിൽ നിന്നുള്ള ഡിഫൻസ് സെക്യൂരിറ്റി ഫോഴ്സിനെയും സജ്ജമാക്കിയിട്ടുണ്ട്. മണ്ണ് നീക്കം ചെയ്യുന്നതിനായി എട്ട് എസ്‌കവേറ്ററുകൾ സ്ഥലത്ത് വിന്യസിച്ചിട്ടുള്ളതിനാൽ രക്ഷാദൗത്യത്തിന് ആവശ്യമായ സേനയുടെയോ ഉപകരണങ്ങളുടെയോ കുറവ് ഉണ്ടാകില്ലെന്നും അദ്ദേഹം പറഞ്ഞു.
അതേസമയം, അപകടസ്ഥലത്ത് മണ്ണ് നീക്കം ചെയ്യാൻ ജില്ലാ കളക്ടറും സംസ്ഥാന ദുരന്ത നിവാരണ അതോറിറ്റിയും നേരത്തെ നിർദേശം നൽകിയിരുന്നുവെന്ന് മുഖ്യമന്ത്രി വ്യക്തമാക്കി. പൊതുമരാമത്ത് മന്ത്രിയുടെ നേതൃത്വത്തിൽ ചേർന്ന യോഗത്തിലും കരാറുകാർക്ക് അടിയന്തരമായി മണ്ണ് നീക്കം ചെയ്യാൻ നിർദേശം നൽകിയിരുന്നെങ്കിലും അത് നടപ്പിലാക്കപ്പെട്ടില്ലെന്നും അദ്ദേഹം പറഞ്ഞു.
ഹൈവേ നിർമാണത്തിൽ ആവശ്യമായ സുരക്ഷാ മാനദണ്ഡങ്ങൾ പാലിച്ചില്ലെന്ന പരാതിയും സർക്കാരിൻ്റെ ശ്രദ്ധയിൽപ്പെട്ടിട്ടുണ്ടെന്നും, ഇക്കാര്യത്തിൽ വിശദമായ പരിശോധന നടത്തുമെന്നും മുഖ്യമന്ത്രി അറിയിച്ചു.
