ജമ്മു കശ്മീരിലെ കുൽഗാമിൽ സി.ആർ.പി.എഫ് ചെക്ക്‌പോസ്റ്റിന് നേരെയുണ്ടായ ഭീകരാക്രമണത്തിന് പിന്നിൽ നിരോധിത ഭീകരസംഘടനയായ ലഷ്‌കർ ഇ ത്വയിബയാണെന്ന് സൂചന. സംഭവവുമായി ബന്ധപ്പെട്ട് മൂന്ന് പേരെ സുരക്ഷാ ഏജൻസികൾ കസ്റ്റഡിയിലെടുത്തു. ആക്രമണത്തിൽ പരിക്കേറ്റ മൂന്ന് ജവാന്മാരിൽ ഒരാളുടെ നില ഗുരുതരമായി തുടരുകയാണ്.
ബൈക്കിലെത്തിയ അജ്ഞാതരായ രണ്ട് അക്രമികളാണ് കുൽഗാമിലെ മിർ മേഖലയിൽ സി.ആർ.പി.എഫ് ചെക്ക്‌പോസ്റ്റിന് നേരെ വെടിയുതിർത്തത്. അപ്രതീക്ഷിതമായുണ്ടായ ആക്രമണത്തിൽ മൂന്ന് സുരക്ഷാ ഉദ്യോഗസ്ഥർക്ക് പരിക്കേറ്റു. വയറ്റിൽ വെടിയേറ്റ ഒരു ജവാൻ്റെ നില അതീവ ഗുരുതരമാണ്. ഇദ്ദേഹത്തിന് വിദഗ്ധ ചികിത്സ ലഭ്യമാക്കുന്നതിനുള്ള നടപടികൾ തുടരുകയാണെന്ന് സർക്കാർ വൃത്തങ്ങൾ അറിയിച്ചു.
ആക്രമണത്തിന് പിന്നാലെ പ്രദേശത്ത് സുരക്ഷാ പരിശോധന ശക്തമാക്കി. ഭീകരർക്ക് സഹായം നൽകിയവരെയും ആക്രമണത്തിൽ പങ്കുള്ളവരെയും കണ്ടെത്തുന്നതിനായി വ്യാപകമായ അന്വേഷണം ആരംഭിച്ചിട്ടുണ്ട്. സംശയത്തിൻ്റെ അടിസ്ഥാനത്തിലാണ് മൂന്ന് പേരെ കസ്റ്റഡിയിലെടുത്തത്.
ആക്രമണത്തിന് പിന്നിൽ പ്രവർത്തിച്ച ഭീകരരെ കണ്ടെത്തുന്നതിനായി സുരക്ഷാസേന തിരച്ചിൽ ശക്തമാക്കിയിട്ടുണ്ട്. മേഖലയിൽ കൂടുതൽ സേനയെ വിന്യസിക്കുകയും അതീവ ജാഗ്രതാ നിർദേശം നൽകുകയും ചെയ്തിട്ടുണ്ട്. സംഭവത്തിൻ്റെ പശ്ചാത്തലത്തിൽ കശ്മീരിലെ സുരക്ഷാ സാഹചര്യം നിരീക്ഷിച്ചുവരികയാണ് അധികൃതർ.
